Almatyda «Uly dala festıvali» ótti

Alataýdyń baýraıynda ótken etnomádenı festıvalge Ázerbaıjan, Bolgarııa men Vengrııa, Qyrǵyzstan, Ózbekstan, Reseı, Slovakııa, AQSh jáne Túrkııanyń ókilderi qatysty.

Etnoaýylǵa kelgender kásibı búrkitshilerdiń, shabandozdar men kókparshylardyń, sadaqshylardyń, batyrlardyń sheberlikterine tánti bolyp, ulttyq oıyndarǵa qatysyp, ulttyq as mázirinen dám tatty. «Uly dala rýhy» festıvaline kelgenderdiń barlyǵy qazaqtardyń jáne basqa da túrki halyqtarynyń baı murasymen tanysty.

Aıta keterligi, uly dala meıramynda qala ákimi Baýyrjan Baıbek te sadaqtan oq atyp, atqa mindi.

Festıvalge kelýshiler eki kún ishinde kóshpendilerdiń ómirine enip, olardyń ejelgi turmysymen, tarıhı salt- dástúrlerimen, ádet- ǵuryptarymen tanysyp, qazaqtardyń kóne turmys- tirshiliginen habardar boldy.

Ertedegi qolónershilerdiń qupııalaryn bilip, sheberlik sabaǵyn úırenip, kıizben, terimen, kúmispen, sazben jumys isteýdiń kóne tehnologııasyn meńgerdi.

«Men festıvaldiń tujyrymdamasyn jasadym. Byltyr Talǵarda ótken bolsa, bıyl Bostandyq aýdanynda ótkizip jatyrmyz. Sebebi, bul jer kıeli jerge jatady. Munda eski qorym kóp. 47 saq qorǵany bar eken. Eskilikte qazaqtar osy qorymdardyń qasynda as bergen eken. Munda úlken maǵyna bar», - dedi stsenarıı avtory Bazarbek Atyǵaev.

«Biz bul festıvalde ertedegi Bolgar áskerleriniń túrli shaıqastarda qoldanatyn sadaqtaryn, qylyshtaryn, jigittik ónerlerin jáne basqalaryn kórsetýdemiz. Qazaqstanǵa alǵash kelýimiz, óte ádemi el eken, eń bastysy, sizder ózderińizdiń ejelgi mádenıetterińiz ben dástúrlerińizdi saqtap qalypsyzdar», - dedi bolgarlyq batyr ıAvýr Gynchev.

«Bul festıvalge qatysqanyma óte qýanyshtymyn, maǵan týys halyqtardyń barlyǵy osynda júr, biz úlken merekede bas qostyq. Eń bastysy - at sportynyń ejelgi tarıhy, ortaq dástúri, at sportynyń órken jaıýy», - dedi Vengrııa ókili Kopachnı Gabor.