Almatyda «Uly Dala Eli» halyqaralyq festıvali bastaldy
Bul týraly búgin osy sharaǵa oraı bolǵan baspasóz máslıhatynda jarııa etildi.
«Qazaq halqynyń asa baı murasy - dástúrli termeshilik, jyrshylyq ónerin qoldaý jáne ony damytý úshin alǵash ret «Uly Dala Eli» halyqaralyq festıvali uıymdastyrylyp otyr. Festıval qazaqtyń dástúrli sóz ónerin nasıhattap, odan ári damytý arqyly halyqtyń otanshyldyq sezimi men ulttyq rýhyn kúsheıtýge, eldik tutastyqty nyǵaıtýǵa jáne «Máńgilik El» ulttyq ıdeıasyn iske asyrýǵa baǵyttalǵan. Festıval aıasynda Qazaqstannyń jáne basqa da túbi bir túrki tildes elderden kelgen ǵalymdar men jyrshylar túrkitildes halyqtardyń dástúrindegi epıkalyq jyraýlyq ónerdiń mán-mańyzyn talqylaıdy» - dedi óz sózinde QR mádenıet qaıratkeri, Almaty qalasy Mádenıet basqarmasy basshysynyń mindetin atqarýshy Erbolat Áýezov.
Aıta ketelik, festıvalge Qyrǵyzstan, Qaraqalpaqstan, Bashqurtstan, Daǵystannyń Noǵaı aýdanynan jáne basqa da elderden ǵalymdar men jyrshylar qatysady.
Búgin tústen keıin saǵat 14:00-ǵa Yqylas atyndaǵy ulttyq mýzykalyq aspaptar murajaıynda «Uly Dala Eli» halyqaralyq festıvali aıasynda mádenıet qaıratkerleriniń sheberlik synyptary jáne erteń tańerteń osy murajaıda saǵat 09:00-de «Túrki halyqtarynyń jyraýlyq óneri men epıkalyq dástúri» degen taqyrypta halyqaralyq ǵylymı-tájirıbelik konferentsııa uıymdastyrylady. Al festıval shymyldyǵy keshki saǵat 19:00-de Abaı atyndaǵy Memlekettik akademııalyq opera jáne balet tetarynda ótetin «Jyr qanatyndaǵy tarıh» atty gala-kontsertpen jabylady.
