Almatyda «Uly dala eli» Halyqaralyq etnofestıvali ótti
Óz repertýaryn Qazaqstan, Iran, Túrikmenstan, Bashqurtstan, Qaraqalpaqstan, Qyrǵyzstan jáne Ózbekstan elderinen barlyǵy 20-dan astam oryndaýshy usyndy.
«Bul festıval dástúrli ónerdi saqtap qalýǵa jáne damytýǵa yqpal etedi. Shyǵarmashyl adamdardy jaqyndastyra túsip, jyrshylyq-termeshilik kóne ónerin nasıhattaıdy. Bul baǵyt, ásirese elimizdiń batys óńirinde jaqsy damyǵan. Onda balalaryn osy ónerge 3 jastan bastap úıretedi», - dedi qazaqstandyq qatysýshy Uljan Baıbosynova.
«Alataý» dástúrli óner teatrynda bastaý alǵan festıval bıyl «Amanat» ataýymen jetinshi ret uıymdastyryldy. Sharaǵa jınalǵandardyń qarasy kóp boldy. Olar oryndaýshylarǵa qyzý qoldaý bildirip, merekege erekshe atmosfera berdi.
«Taqyrybyn kezdeısoq tańdaǵanymyz joq. Ata-babalarymyz bul ónerdi asa qasterlep, óz oqýshylaryna erekshe kóńil bólip kelgen. Osy dástúrdi saqtaı otyryp, bul joly shákirt pen ustazdy sahnaǵa birge shyǵarýdy jón sanadyq. Bul – óte qyzyqty», - dep qosty Uljan.
Kórermenderdiń aldynda balalar da óner kórsetti. Sharanyń sońyna qaraı sahnaǵa shyqqan balalar sharanyń shyrqaý shegi boldy. Elimizdiń ár óńirinen kelgen úsh jas oryndaýshy «Amanat» týyndysyn áýeletti.
Festıvaldi «Rýhanı jańǵyrý» baǵdarlamasynyń sheńberinde Almaty qalasynyń Mádenıet basqarmasy men «El» prodıýserlik kompanııasy uıymdastyrdy.
