Almatyda «Uly dala eli» halyqaralyq etno-festıvali ótedi
1000 jyldyq tarıhy bar alyp shaharda osymen úshinshi jyl qatarynan uıymdastyrylyp otyrǵan etno-festıval elimizde ǵana emes, kúlli túrki áleminde kóne murany kóziniń qarashyǵyndaı saqtap kele jatqan jyrshy-termeshilerdiń asyǵa kútetin saltanatty keshine aınalǵan. Aıtýly shara qazaq, qyrǵyz, noǵaı, túrkimen, qaraqalpaq, bashqurt, ózbek eliniń jyr-termeli oryndalyp, túbi bir túrkiniń ádebıeti men mádenıeti, dili men dástúri ortaq ekenin tanytty.
Bıyl da Qaraqalpaqstan, Ózbekstan, Túrkimenstannan shaqyrtylǵan jyrshylar «Kóruǵly», Qaraqalpaq halyq termesi syndy tarıhy tereń shyǵarmalardy oryndap, tyńdaýshylaryn tánti etpek.
Sonymen qatar, Syr, Oral, Mańǵystaý óńiriniń jyraýlyq óneriniń has sheberleri, búgingi qazaq jyrshylarynyń aqsaqaldary Hatımolla Berdiǵalıev, Bıdas Rústembekov, Óserbaı Sársenbaev bastaǵan jyrshy-termeshilerimiz ónerlerin ortaǵa salady.
Sahnada Murat Móńkeniń «Úsh qııan» dastany, Súgirdiń tolǵaýy, Nartaıdyń bastaýy, Maılyqojanyń «Jaqsy bir adam qartaısa» termesi, Baltabasov Túmenniń «Mańǵystaý» dastany oryndalady.
Óner keshinde jas jyrshylar da halyq aldyna shyqpaq. Dálirek aıtsaq, Ýathan Shattyq, Juldyz Ysqaqova jáne Raýan Ábilbaev ult murasynyń tunyǵynan nár tatyrmaq.
Keshte aıtylatyn jyr-termeniń shyǵý tarıhy baıandalyp, onyń jetkizýshisi jaıynda ádemi áńgime órbıdi.
