Almatyda «Uly dala eli» festıvalinde Ortalyq Azııa jyrshylary bas qosty
«Alataý» dástúrli óner teatrynda halyqaralyq «Uly dala eli» festıvali uıymdastyryldy. Dástúrli epos festıvaliniń bıylǵy baǵdarlamasy Astananyń 20 jyldyq mereıtoıyna arnaldy.
Qazaqstandyq jyrshylarmen birge Qyrǵyzstan, Ózbekstan, Qaraqalpaqstannan kelgen jyr oryndaýshylar dala áýenin sahnadan sarnatty.
Festıvalge kelgen 14 qatysýshy qyrǵyzdyń «Manas» jyryn, túrkiniń «Tekeı batyr», «Alpamys» dastandaryn oryndady.
«Qyrǵyzstandyq áıgili jyrshy Dooletbek Sadykov «Manas» eposyn, Ózbekstannan kelgen Abdynazar Poıanov «Alpamys» eposyn oryndady. Sondaı-aq Qaraqalpaqstannan Dınara Nuratdınova atty jas baqsy keldi. Túrki halyqtaryna ortaq jyraýlyq dástúr festıvaliniń Almatyda ótýi tegin emes. Jetisý jerinde kóshpendi halyqtyń tabanynyń izi qalǵan. Ejelden kele jatqan jyraýlar poezııasy búgin de mańyzǵa ıe», - dedi qazaqstandyq jyrshy Uljan Baıbosynova.
Onyń aıtýynsha, jyrshylyq dástúr Qazaqstannyń ońtústik pen batys aımaqtarynda saqtalǵan.
«Jyrshylyq óner Qyzylorda oblysynda keń taraǵan. Ol jaqta jyrshylyq óneri atadan balaǵa, ustazdan shákirtke beriledi. Mańǵystaý oblysynda da bul dástúr saqtalǵan. Almatynyń Jetisý aýdanynda urpaqtarǵa túrki halqynyń mýzykasyn dáripteıtin ortalyq bar», - dedi ol.
Qatysýshylar 7 mınýttan bir jarym saǵatqa deıin sozylatyn epostardy oryndady.
«Bul joly epıkalyq shyǵarmalar men qaharmandar týraly ańyzdar, dastandar aıtyldy. Jyldan jylǵa olardyń oryndalý máneri ózgerip, mazmundyraq bolyp keledi», - dedi festıvaldiń stsenarıı avtory Bazarbek Atyǵaev.
«Rýhanı jańǵyrý» aıasynda júzege asqan festıval túrki halyqtarynyń ejelgi murasy - jyraýlyq dástúrdiń umytylmaýyn murat etedi.
