Almatyda uly balerına Galına Ýlanovanyń týǵanyna 100 jyl tolýyna arnalǵan saltanatty kontsert ótti

dep habarlaıdy QazAqparat.

Kesh Almaty qalasy ákimdiginiń qoldaýymen, Qazaqstan horeograftar odaǵy, Abaı atyndaǵy opera jáne balet teatry, A. Seleznev atyndaǵy Almaty horeografııalyq ýchılışesi jáne QR Shyǵarmashylyq konfederatsııa odaǵynyń uıymdastyrýymen ótti.

Kontsert barysynda barlyq óner súıer qaýym, elimizdiń shyǵarmashylyq qoǵamdary balerınaǵa degen ystyq yqylastary men tereń qurmetin bildirdi.

«Galına Ýlanova - Qazaqstanda ǵana emes, álemniń mádenıet jáne óner tarıhynda ózindik este qalar izin qaldyrǵan HH-shy ǵasyrdyń eń zor balerınasy. Ol Qazaqstan balet óneriniń damýyna úlken zor yqpal etken adamnyń biri. Búginde onyń bıleý, óner kórsetýi, oryndaý sheberligi - Qazaqstan horeografııasynda ǵana emes, álem baletiniń etalonyna aınaldy. Uly Otan soǵysy kezinde Galına Ýlanova Almaty horeografııalyq ýchılışesinde balet kýrsynda oqıtyn joǵarǵy synyp oqýshylaryna dáris oqyp, sheberlik synyptar ótkizdi. Men osy oraıda, Galına Ýlanovanyń horeografııa ýchılışesiniń damýyna úlken úles qosqanyn aıtqym keledi. Qazirgi kúni bul oqý orny- Ortalyq Azııadaǵy aldyńǵy qatardaǵy oqý ordasyna aınaldy. Men uly balerına týraly estelik urpaqtan urpaqqa jalǵasa beredi dep oılaımyn. Búgingi kontsertte jas balet ártisteri osy sahnada kezinde Galına Ýlanova óner kórsetken qoıylymdardy qoıǵanyna qýanyshtymyn», dedi QR eńbek sińirgen qaıratkeri, A. Seleznev atyndaǵy Almaty horeografııalyq ýchılışesiniń kórkemdik jetekshisi, QR qurmetti bilim qyzmetkeri Maıra Qadyrova.

Uly balerına 1910 jyly qańtar aıynyń 8-i kúni Sankt-Peterbýrg qalasynda Marıınsk teatry balet ártisteriniń otbasynda dúnıege kelgen. Ol 1928 jyly Lenıngrad qalasyndaǵy horeografııa ýchılışesin bitirgen. Qyzmet jolyn S.M.Kırov atyndaǵy opera jáne balet teatrynda bastaǵan ol teatr sahnasynda alǵash ret «Spıaşaıa krasavıtsa», «Lebedınoe ozero» qoıylymdarynda tuńǵysh ret óner kórsetti. 1960 jyly jeltoqsan aıynyń 29-y kúni Úlken teatrda «Shopenına» baletime sahnaǵa sońǵy ret shyǵyp, kórermendermen qoshtasty. Odan keıin ol osy teatrda 30 jyldan astam ýaqyt pedagog-repetıtor bolyp qyzmet jasady. Galına Ýlanova 1942-1944 jyldary Abaı atyndaǵy opera jáne balet teatrynyń aldyńǵy qatarly balerınasy bola júrip, B. Asafevanyń «Bahchısaraıskıı fontan», A. Adananyń «Jızel» jáne P. Chaıkovskııdiń «Lebedınoe ozero» balet qoıylymdarynyń bastamashysy bolǵan. Osy partııalarda basty rólderde óner kórsetken bolatyn.

1944 jyly Galına Ýlanovaǵa Qazaq SSR-niń Halyq ártisi degen qurmetti ataǵy berildi. Ol sońǵy ret Almatyǵa 1995 jyly kelip, el prızıdenti N.A. Nazarbaevtyń qatysýymen ótken, klassıkalyq bıden І-shi "Dástúr syılyǵy" Halyqaralyq festıvalin ashqan bolatyn. Elbasy sol saparda Galına Ýlanovany "Parasat" ordenimen marapattady.

Uly balerına 1998 jyly naýryzdyń 21-inde dúnıeden ótti. Ol Reseıde Novodevıch zıratynda jerlengen.