Almatyda Ulttyq ulannyń sarbazdary Qazaqstanda alǵashqylardyń biri bolyp daýys berdi
5571-áskerı bóliminde ornalasqan № 107 saılaý ýchaskesinde sap túzegen sarbazdar daýys berýdi tańǵy saǵat 06:00-de bastady.
«Búgin erekshe kún. Sebebi Qazaqstan Respýblıkasynyń azamaty retinde daýys berý quqyǵymdy paıdalanyp turmyn»,- dedi qatardaǵy jaýynger Rıchard Zaıenchkovskıı. Qatysýshylardyń basym bóligi alǵash ret daýys berip jatyr. Solardyń biri, 6 aı buryn áskerge shaqyrylǵan Aman Ermahan. «Men Astana qalasynan shaqyryldym. Ómirimde birinshi ret daýys berdim. Otanymyzdyń bolashaǵyna beı-jaı qaraı almaımyn. Sondyqtan óz tańdaýymdy jasadym», - deıdi sarbaz Aman Ermahan.
Áskerı bólimde saılaý ótkizýge barlyq jaǵdaı jasalǵan. Saılaý jáshikteri men 7 daýys berýge arnalǵan kabına bar. «Bizdiń saılaý ýchaskesinde daýys berý tańǵy saǵat altyda bastaldy. Bizdiń maqsat- Qazaqstannyń damaýyna, órkendeýine óz úlesimizdi qosý.
«Alyptyń qýaty halyqta, halyqtyń qýaty birlikte», demekshi saıası naýqanǵa úlken jaýapkershilikpen qatysyp jatyrmyz. Sarbazdardyń kóńil kúıi óte jaqsy», - deıdi 5571-áskerı bóliminiń komandıri Baqdaýlet Oraluly.
Almaty saılaý komıssııasynyń málimetinshe, megapolıstegi 7 áskerı bólimde daýys berý saǵat altyda bastaldy.
Buǵan deıin habarlaǵanymyzdaı, Astana ýaqytymen tańǵy saǵat 4-te Seýlde №258 jáne Tokıoda №261 saılaý ýchaskeleri álemde birinshi bolyp ashyldy.
Ońtústik Koreıadaǵy QR azamaty kýrsant Asanov Elnýr birinshi bolyp daýys berdi. Keıin álimniń taǵy 9 qalasynda daýys berý bastaldy.
QR Konstıtýtsııasyna sáıkes, Parlament Májilisi aralas saılaý júıesi boıynsha Konstıtýtsııalyq zańda belgilengen tártippen saılanatyn 98 depýtattan turady. Biryńǵaı jalpyulttyq saılaý okrýgi aýmaǵy boıynsha, ıaǵnı partııalyq tizim boıynsha Májilistiń 69 depýtaty, bir mandatty aýmaqtyq saılaý okrýgteri boıynsha – 29 depýtat saılanady.
19 qańtarda Memleket basshysy Qasym-Jomart Toqaev jetinshi saılanǵan QR Parlamentiniń Májilisin taratý jáne 19 naýryz kúni Parlament Májilisi depýtattarynyń kezekten tys saılaýyn taǵaıyndaý týraly Jarlyqqa qol qoıǵan edi. Bul kúni Májilispen qatar máslıhat depýtattaryn da kezekten tys saılaý usynyldy.
Bul kúni 12 mln-ǵa jýyq azamat tańdaý jasaıdy. Aldyn ala turǵylyqty jeri boıynsha 11 970 406 saılaýshy anyqtaldy. Saılaýshylardyń eń kóbi – 1 177 507 saılaýshy Túrkistan oblysynda, al eń azy – 138 277 saılaýshy Ulytaý oblysynda tirkelgen. 2023 jylǵy 4 naýryzdan bastap ýchaskedegi saılaýshylar tizimindegi derekteri tekserý múmkindigi berildi.
