Almatyda «Ulttyq taqyryptaǵy Natıýrmort» atty halyqaralyq kórkem shyǵarmalar baıqaýy bastaldy

ALMATY. QazAqparat – Memlekettik ortalyq mýzeıinde QR Tuńǵysh Prezıdenti kúnine oraı «Uly dalanyń jeti qyry» maqalasy aıasynda «Ulttyq taqyryptaǵy Natıýrmort» atty halyqaralyq kórkem shyǵarmalar baıqaýy bastaldy, dep habarlaıdy QazAqparat tilshisi.

«Ulttyq taqyryptaǵy Natıýrmort» kórmesinde Almaty qalasynyń kórkem óner kolledjderi men joǵary oqý oryndary oqytýshylarynyń 100-den astam shyǵarmashylyq jumystary usynyldy. Kórme túrli janrlyq baǵytty – keskindeme, grafıka, músin, sándik-qoldanbaly ónerdi qamtıdy.

Ár kartınanyń kompozıtsııalyq sheshimi – ózindik qoltańbasy, stıli bar sýretshiniń baı ishki rýhanı álemin kórsetedi. Akvarel jáne maıly tehnıkadaǵy tamasha kórkem jumystar; sándik-qoldanbaly óner týyndylary: mataǵa sýret salý – sýyq jáne ystyq batık, kıiz, gobelen, qysh jáne t.b. Baıqaýǵa qatysýshylar arasynda Qazaqstan, Tájikstan, Ózbekstan jáne Reseıden kelgen stýdentter bar.

Kórmeniń maqsaty: oqýshylardyń kórkem shyǵarmashylyǵyn qoldaý, sándik-qoldanbaly ónerdegi baıqaýǵa qatysýshylardyń kásibı daǵdylaryn jetildirý, otandyq jáne álemdik tarıh pen mádenıetke degen qyzyǵýshylyǵyn arttyrý, Qazaqstannyń tarıhı-mádenı murasyn jastar arasynda nasıhattaý, sýretshilerdiń beıneleý jáne qoldanbaly ónerdiń túrli janrlarynda jáne tehnıkalarynda oryndalǵan shyǵarmashylyq jumystaryn kórsetý.