Almatyda ulttyq sportty damytý máselesi talqylandy
Nur-Sultan. QazAqparat - Búgin Almaty qalasy ákimdiginiń qoldaýymen «Suńqar» shańǵy tramplıni kesheninde QR Ulttyq sport qaýymdastyǵy Ulttyq at sportynan Jastar arasyndaǵy І Azııa chempıonaty men Búkilálemdik etnosport konfederatsııasynyń «Rýhanı jańǵyrý. Ulttyq sportty damytý» atty ІІ Halyqaralyq etnosport forýmyna oraı baspasóz máslıhaty ótti, dep habarlaıdy QazAqparat tilshisi.
QR Ulttyq sport qaýymdastyǵynyń baspasóz qyzmeti málim etkendeı, shara barysynda Almaty qalasy Sport basqarmasy basshysynyń orynbasary Erkebulan Kenjebolatov, Almaty oblysy Sport basqarmasy basshysy Nurbaqyt Teńizbaev, sondaı-aq QR Ulttyq sport qaýymdastyǵynyń atqarýshy dırektory Rahat Jaqsybaı atalmysh sharalardyń daıyndyq jumystaryna toqtalyp, BAQ ókilderiniń saýaldaryna jaýap berdi.
- Jastar arasyndaǵy І Azııa chempıonatyna tek elimizdiń emes, birqatar memleketterdiń eń tańdaýly, jas ta bolsa tájirıbeli sportshylary qatysady. Bul ásirese Ulttyq sport túrleriniń keń qanat jaıýyna, jas mamandardyń tájirıbe almasýyna,shyńdalýyna erekshe serpin beredi», - dedi N.Teńizbaev.
Al óz kezeginde Almaty qalasy Sport basqarmasy basshysynyń orynbasary Erkebulan Kenjebolatov «álemniń 30-ǵa jýyq memleketinen 150-den astam etnosport delegatsııalary qatysady dep kútilgen. Onyń ishinde sport mınıstrligi basshylary, ulttyq sporttyń maıtalmandary, halyqaralyq dárejedegi jattyqtyrýshylar, tájirıbeli tóreshiler, myqty sportshylar men qoǵam qaıratkerleri qatysady. Qazir osynshama qonaqtardy kútip alý úshin, forýmnyń joǵary deńgeıde ótýi úshin daıyndyq jumystary qyzý júrip jatyr», - dep atap ótti.
Sodaı-aq, «jastar arasynda bolatyn І Azııa chempıonaty, Almaty qalasynda ótetin Halyqaralyq etnosport forýmy da barlyǵymyz úshin úlken jaýapkershilikti mindetteıdi. Almaty qalasy men Almaty oblysy ákimdikteri osy eki sharaǵa da úlken qoldaý bildirip otyr. Sonymen qatar, QR Mádenıet jáne sport mınıstrligi, Búkilálemdik etnosport qaýymdastyǵy, TIKA agenttiginiń de qamqorlyǵyn kórip otyrmyz. Qalaı desek te áleýmet úshin, shet elden keletin qurmetti qonaqtar úshin de jaqsy jaǵdaı jasaýymyz tıis», - dep atap ótti QR Ulttyq sport qaýymdastyǵynyń atqarýshy dırektory Rahat Jaqsybaı.
Aıta keteıik, 16-21 sáýirge belgilengen chempıonat kókpar, aýdaryspaq, teńge ilý jáne jamby atý sport túrlerinen Almaty qalasy mańyndaǵy «Baıserke-Agro» atshabarynda ótedi. Azııanyń 10 eliniń qurama komandalarynyń qatysýymen ótetin baıraqty básekege Qazaqstan, Reseı, Qytaı, Monǵolııa, Ózbekstan, Tájikstan, Aýǵanstan, Qyrǵyzstan, Vengrııa, Túrkııa, Malaızııa memleketteriniń úzdik sportshy jastary І Azııa chempıonatynyń júldelerin sarapqa salady.
Al, 20-21 sáýirde «Royal Tulip Almaty» qonaq úıinde Almaty qalasy ákimdiginiń qoldaýymen Búkilálemdik etnosport konfederatsııasynyń «Rýhanı jańǵyrý. Ulttyq sportty damytý» ІІ Halyqaralyq etnosport forýmy ótedi. Halyqaralyq sharalardyń Bas seriktesi - «Samuryq-Qazyna» ulttyq ál-aýqat qory.
Esterińizge sala keteıik, osyǵan deıin atalǵan jarysta el namysyn qorǵaıtyn sportshylardy tanystyryp ketken bolatynbyz.
