Almatyda ulttyq sport túrlerinen І Azııa chempıonaty ótedi
NUR-SULTAN. QazAqparat - 16-21 sáýir aralyǵynda Almaty qalasynyń irgesindegi atshabarda Jastar arasyndaǵy І Azııa chempıonaty ótedi. Kókpar, aýdaryspaq, teńge ilý jáne jamby atý sportynan 8 memleket komandalary tuńǵysh uıymdastyrylǵan Azııa chempıonatynyń júldelerin sarapqa salady, dep habarlaıdy QazAqparat tilshisi.
QR Mádenıet jáne sport mınıstrligi sport jáne dene shynyqtyrý komıtetiniń baspasóz qyzmetinen habarlanǵandaı, QR Ulttyq sport qaýymdastyǵy uıymdastyrýymen ótetin Jastar arasyndaǵy І Ashyq Azııa chempıonatynda Qazaqstan, Vengrııa, Reseı, Qytaı, Monǵolııa, Ózbekstan, Tájikstan, Aýǵanstan, Qyrǵyzstan memleketteriniń jastar komandalary baq synaıdy. Chempıonattyń bas tóreshisi - QR Ulttyq sport túrlerinen memlekettik bas jattyqtyrýshy Qýanyshbek Quramaev. Sondaı-aq, kókpar, aýdaryspaq, teńge ilý jáne jamby atý sportynyń bas tóreshileri anyqtalǵan. Atap aıtqanda, kókpar sportyna - Nurdáýlet Momynov, aýdaryspaq sportyna Janysbek Saev, teńge ilý sportyna - Ramazan Mahatov, jamby atý sportyna - Eldos Badashev bas tóreshi bolyp bekitilgen.
«Qazirgi kezde Taraz qalasynda kókpar sportynan І Azııa chempıonatynyń oqý-jattyǵý jıyny bastalyp ketti. Kókpardan QR Jastar ulttyq quramasyn jattyqtyrýshy - QR Jastar men jasóspirimder komandasynyń aǵa bapkeri Atameken Rústemov. Bul oqý-jattyǵý jıynyna bıylǵy Jastar arasyndaǵy Qazaqstan chempıonatynda úzdik dep tanylǵan jıyrmaǵa jýyq kókparshy qatysýda. Eki aptalyq oqý-jattyǵý jıynynan soń kókpardyń bilikti mamandary sheshimimen kókpardan QR Ulttyq jastar qurama komandasy jasaqtalady. І Azııa chempıonatynda Qazaqstan namysyn qorǵaıtyn sportshylar esimderi de sol kezde belgili bolmaq», - delingen habarlamada.
Al, ulttyq sporttyń jamby atý, aýdaryspaq, teńge ilýden І Azııa chempıonatyna daıarlyq úshin ótetin oqý-jattyǵý jıyny 3 sáýir kúni bastaldy. Birer kúnde Tarazdaǵy atalmysh oqý-jattyǵý jıynyna Aýǵanstan Jastar qurama komandalary kelip qosylady dep kútilýde.
