Almatyda ulttyq sport túrlerinen Azııa chempıonaty ótedi
ASTANA. QazAqparat - 2019 jyldyń Jastar jyly dep jarııalanýyna oraı, Almatyda kóktemde ulttyq sport túrlerinen jastar arasynda Azııa chempıonaty ótedi, dep habarlaıdy QazAqparat tilshisi.
«2019 jyl Qazaqstanda Jastar jyly dep jarııalanǵan bolatyn. Osyǵan baılanysty 15-22 sáýir aralyǵynda ulttyq sporttyń tórt túrinen, atap aıtqanda kókpar, aýdaryspaq, teńge ilý, jamby atýdan Azııa chempıonaty ótedi. Saıys Almaty qalasyndaǵy atshabarda uıymdastyrylady. 8 komanda qatysady dep kútip otyrmyz. Búgingi keńes otyrysyna on memleket qatysyp otyrǵandyqtan, búl chempıonatqa men barlyq komandalardy shaqyramyn», - dedi Astanada álemniń 10 eliniń Ulttyq sport federatsııa basshylarynyń qatysýymen ótken Búkilálemdik kókpar qaýymdastyǵynyń keńesinde QR Ulttyq sport túrleri qaýymdastyǵynyń atqarýshy dırektory Rahat Jaqsybaı.
Qaýymdastyq ókili óz sózinde chempıonatqa 21 jasqa deıingi sportshylar qatysatynyn tilge tıek etti.
«Sonymen birge, 20-21 sáýir aralyǵynda Búkilálemdik etnosport konfederatsııasynyń ekinshi halyqaralyq konferentsııasy ótkiziledi. Oǵan 30-40 memleket qatysatyny kútilýde. Aıtýly jıynǵa 20-ǵa tarta eldiń sport mınıstri shaqyrylǵaly otyr. Konferentsııa barysynda at sportyn damytý máseleleri talqylanady», - dedi ol.
Eske sala ketsek, Astanada álemniń 10 eliniń Ulttyq sport federatsııa basshylarynyń qatysýymen Búkilálemdik kókpar qaýymdastyǵynyń keńesi ótken bolatyn. Keńeste qaýymdastyqqa jańa músheler qabyldanyp, halyqaralyq jarystardy uıymdastyrý tártibi qaraldy. Jıynda kókpardyń halyqaralyq erejeleri talqylandy. Keńeske Qazaqstan, Majarstan, Túrkııa, Qytaı, Ózbekstan, Tájikstan, Aýǵanstan, Mońǵolııa, Qyrǵyz Respýblıkasy, Reseı ulttyq federatsııasynyń ókilderi qatysty.
Sondaı-aq, keńes kezinde kókpardyń halyqaralyq erejesine hattama negizinde joǵaryda atalǵan 10 eldiń ulttyq federatsııa basshylary qol qoıdy.
