Almatyda Ulttyq shyǵarmashylyq festıvali bolyp ótti
ALMATY. 10 qyrkúıek. QazAqparat /Názıra Eleýhan/ - Búgin Almatyda Ǵ.Músirepov atyndaǵy Qazaq memlekettik akademııalyq balalar men jasóspirimder teatry aldynda Ulttyq shyǵarmashylyq festıvali bolyp ótti.
Halyqaralyq kóshbasshylyq ortalyqqa qarasty "LP-44" bastamashyl toptyń uıymdastyrýymen ótken sharaǵa qala turǵyndary men qonaqtary, qolóner sheberleri men mádenıet qaıratkerleri, sonymen qatar jastar qaýymy qatysty.
"Búgingi shara ulttyq mádenıetimizdi saqtaý men odan ári damytý jáne jas býynǵa ulttyq tárbıe berý men jastardy ulttyq dástúrimizdi qurmetteýge tárbıeleý maqsatynda ótkizilip otyr",-dedi "LP-44" bastamashyl toptyń múshesi Mahabbat Seıtova.
Búgin festıval barysynda arnaıy qoıylǵan qoıylymda "Besik salý" men "Tusaý kesý" dástúri kórsetildi. Jáı ǵana kórsetilip qane qoımaı, qazaq halqynyń ǵasyrlar boıy jalǵasyp kele jatqan salt-dástúrlerin qalaı durys jasaý kerek ekendigi jáne onyń ónegeligi aıtyldy. Sonymen qatar, barsha jurtqa "Qara jorǵa" bıin qalaı durys bıleý kerek ekendigi túsindirildi.
Festıval aıasynda qolóner sheberleriniń jármeńkesi de bolyp ótti. Jármeńkege qolónershilerdiń óz qoldarynan shyqqan jumystary qoıyldy. Sheberler festıval barysynda barlyq qalaýshylarǵa ulttyq shyǵarmashylyq túrleri boıynsha sheberlik synyptar ótkizdi.
Shara barysynda "Arqan tartý", "Kókpar", "Asyq atý" jáne taǵy da basqa ulttyq sport túrlerinen jarystar bolyp ótti. Sporttyq sharalarǵa qatysqan jeńimpazdar baǵaly syılyqtarmen marapattaldy.
