Almatyda ulttyq dombyra kúni qalaı toılanady

ALMATY. QazAqparat- Almatyda 2 shilde kúni saǵat 20:00-de Abaı alańynda ulttyq dombyra kúnine oraı «Ańyz Dombyra» merekelik kontserti ótedi, dep habarlaıdy QazAqparat tilshisi.

Merekelik baǵdarlama aıasynda Meırambek Bespaev, Asylbek Eńsepov, Ǵazızhan Shekerbek, Janar Aıjanova, «Alashuly» toby, Tamara Asar, Erbolat Qudaıbergen, Nurlan Alban, «Ulytaý» toby, Raım Ýaıs, Kyle Ruh, «Made in KZ» óner kórsetedi.

Sonymen qatar kontsertke tanymal kúıshiler – Nurjan Tájikenov, Aıgúl Qosanova, Tileýles Qurmanǵalıev, Sáýle Janpeıisova, Gúlmıra Sarına, Ardaq Isataeva jáne Erkin Qudaıbergen qatysady.

Olar uly kompozıtorlar Qurmanǵazy men N.Tilendıevtiń tanymal halyq ánderi men shyǵarmalaryn oryndaıdy.

Іs-shara aıasynda qazaq halyq aspaptary sheberlerin – talantty qolónershilerdi estelik syılyqtarmen marapattaý ótedi.

Ulttyq dombyra kúni qalanyń basqa aýdandarynda da merekelenedi:

- Áýezov aýdanynda «Ulttyq dombyra kúni» merekelik fleshmoby 2 shilde kúni saǵat 09:00-de Altynsarın dańǵyly, 23 mekenjaıynda aýdan ákimdigi ǵımaratynyń aldynda ótedi.

- Alataý aýdanynda «Naǵyz qazaq qazaq emes, naǵyz qazaq – dombyra!» merekelik kontserti Ulttyq dombyra kúnine oraı 2 shilde kúni saǵat 11:00-de Nurkent 5/11 shaǵyn aýdanyndaǵy dástúrli mýzykanyń mýltımedııalyq ortalyqta ótedi.

- Jetisý aýdanynda ulttyq dombyra kúnine arnalǵan «Altyn dombyra – Jetisý áýeni» janbasyna qarjylandyrý aıasynda balalar arasyndaǵy baıqaý 2 shilde kúni saǵat 12:00-de Serikov kóshesi, 2 mekenjaıyndaǵy «Gúlder» saıabaǵynda ótedi.

- Medeý aýdanynda 30 dombyrashy men Medeý aýdanynyń jalpy bilim beretin mektepteri oqýshylarynyń qatysýymen shaǵyn fleshmob 1 shilde saǵat 10:00-de, Zenkov kóshesi jaǵynan 28 gvardııashy-panfılovshylar atyndaǵy saıabaqta ótedi

- Naýryzbaı aýdanynda «Dombyra party» merekelik kontserti 30 maýsym kúni saǵat 19:00-de Shuǵyla, 347 mekenjaıynda aýdan ákimdigi ǵımaratynyń aldynda ótedi.

- Túrksib aýdanynda Ulttyq dombyra kúnine arnalǵan merekelik fleshmob 1 shildede saǵat 10:00-de, Seıfýllın dańǵyly 13/1 boıyndaǵy №6 oqýshylar úıiniń aldyndaǵy alańda ótedi.

Sonymen qatar, Almaly jáne Bostandyq aýdandarynda Ulttyq dombyra kúnine arnalǵan dombyrashylar fleshmoby ótedi.

Aıta keterligi, ulttyq aspaptyń qurmetine arnalǵan mereke Qazaqstanda shildeniń birinshi jeksenbisinde atalyp ótedi.

Buǵan deıin ánshi Meırambek Besbaev almatylyqtardy dombyra kúnine arnalǵan is-sharaǵa erekshe ádispen shaqyrǵan bolatyn.