Almatyda úleskerlerdi aldap kelgen kompanııa páterlerin satýǵa tyıym salyndy
Almaty ákimine «Ush-Qonyr» jáne «Vesnovka» jańa turǵyn úı kesheniniń úleskerleri aldanyp, pátersiz, aqshasyz qalǵandaryn aıtyp, shaǵymdandy.
«Biz Development KB kompanııasyna aldanyp qalǵan úleskerlermiz. Kompanııa páterlerdi «Lider Group» degen kompanııa arqyly satty. Sodan keıin olar ózara kelisim-shartty buzdy. «Vesnovka» turǵyn úı kesheniniń qurylysy toqtap qaldy, qazir ne aqshamyz, ne páterimiz joq. Merdigerler páterler olarǵa tirkelmegenin aıtady.«Vesnovka» TK boıynsha qylmystyq is keshiktirilip jatyr. Al kompanııa páterlerdi satýdy jalǵastyrýda.Osy jaǵdaıdy qarap shyǵýyńyzdy suraımyz», – dedi úlekerlerdiń biri.
Óz kezeginde qala qurylysyn baqylaý basqarmasynyń basshysy Development KV «Ush Qonyr» turǵyn úı keshenin salǵan kompanııa ekenin atap ótti «Atalǵan kompanııa Almaly aýdanynda ornalasqan «Vesnovka» turǵyn úı kesheniniń qurylysyn qolǵa aldy. Dál «Ush-Qonyr» sııaqty olar páter satýmen aınalysatyn «Lider Group» kompanııasymen kelisim jasaǵan.Biz bul faktini anyqtap, úleskerlermen kezdesip, polıtsııa men sybaılas jemqorlyqqa qarsy qyzmetke aryz berdik», - dedi Baqytjan Naýryzbekov.
Almaty Polıtsııa departamentiniń bastyǵy Arystanǵanı Zapparov «Ush Qonyr» turǵyn úı keshenindegi páterlerdi satýǵa tyıym salǵanyn, al «Vesnovka» turǵyn úı kesheni paıdalanýǵa berilmegenin málim etti.
«Qazirgi ýaqytta «Lider Group» kompanııasynyń qyzmeti toqtatyldy, tergeý júrip jatyr. Basshyǵa qatysty eshqaıda ketpeý týraly jazbasha túrdegi bultartpaý sharasy tańdaldy», - dep atap ótti Polıtsııa departamentiniń basshysy.
Qala turǵyndarynyń biri salynǵan tyıymǵa qaramastan «Ush Qonyr» turǵyn úı keshenindegi páterlerdi satý áli jalǵasyp jatqanyn tilge tıek etti. Qala prokýrory Berik Júıriktaev barlyq is bir óndiriske biriktirilgenin atap ótti. Kompanııanyń dırektory men bas esepshisine qatysty tergeý júrip jatyr.
«Tintý júrgizildi, barlyq qujattar tárkilendi, qazir saraptama daıyndalyp jatyr. 141 páterdi satýǵa tyıym salyndy, qazirdiń ózinde is boıynsha bizde 50 jábirlenýshi bar», - dedi prokýror.
Almaty ákimi Erbolat Dosaev qalalyq prokýratýraǵa isti baqylaýǵa alýdy tapsyrdy.
«Eger páterlerdi satýmen aınalysqan basshyǵa qatysty shekteý sharalary qoldanylsa alaıda ol úleskerlerdiń aıtýynsha, satýdy jalǵastyrsa, onda onyń kásipkerlik qyzmetin shekteý kerek. Eger ol jumysyn jalǵastyrsa, zańda belgilengen tártippen usynys engizińiz, sotqa júginińiz, onyń erkindik dárejesin shekteńiz», - dedi ákim prokýrorǵa.
Buǵan deıin Almaty ákimine «Ush-Qonyr» jańa turǵyn úı kesheniniń úleskerleri aldanyp, pátersiz, aqshasyz qalǵandaryn aıyp shaǵymdanǵan bolatyn.
