Almatyda ýlanǵan balalar úılerine qaıtaryldy
ALMATY. QazAqparat - Almatyda ýytty ballonnyń shashyraýynan japa shekken balalardyń barlyǵy úılerine qaıtaryldy, dep habarlaıdy QazAqparat tilshisi.
Tótenshe jaǵdaı týraly habarlama 17:05-te túsken. Oqıǵa ornyna 11 jedel járdem brıgadasy barǵan. Barlyǵy 36 oqýshy Balalarǵa shuǵyl medıtsınalyq kómek berý ortalyǵyna jetkizilip, oqýshylarǵa belgisiz zattan ýlanǵan degen dıagnoz qoıyldy. Olardyń barlyǵy tunshyǵyp, kózderi jasaýrap, bastary aýyryp keldi.
«Balalardy bilikti mamandardan quralǵan mýltıdıstsıplınarlyq komanda qarap shyqty. Dıagnostıkalyq tekserýlerden soń 6 bala ambýlatorııalyq em qabyldaýǵa úıine jiberildi. Toksıkologııa bólimshesinde 29 bala jatyp shyqty. 1 qyz bala jansaqtaý bóliminde jatqan bolatyn. Oǵan ýly gaz kóbirek shashyraǵan. Basy aýyryp, kózi jasaýrap tústi. Belgisiz gaz bolǵan soń saqtandyrý retinde olar aýrýhanaǵa jatqyzyldy. Balalarǵa qatysty dezıntoksıkatsııalyq em sharalary júrgizildi. Olardyń ómirine esh qaýip tónip turǵan joq. Qazir balalardyń barlyǵy úılerine ambýlatorııalyq em qabyldaýǵa qaıtaryldy», - dedi qalalyq Densaýlyq saqtaý basqarmasynyń Ana men bala densaýlyǵyn qorǵaý bóliminiń basshysy Əsel Bısenbaeva.
Onyń aıtýynsha, qazir balalardyń barlyǵy sabaqqa baryp júr.
Aıta ketý kerek, №173 mektepte túski 16:00 shamasynda tótenshe jaǵdaı oryn aldy. 7 synyp oqýshylary úlken qońyraý kezinde ýytty ballondaǵy zatty shashyratyp alǵan.
Mundaı jaǵdaı Almatyda birinshi ret bolyp jatqan joq.
Osydan birneshe aı buryn mektepte burysh ballony shashyrap birneshe bala ýlanǵan edi.
