Almatyda Ýkraına azamatyn soqqyǵa jyqqan 4 stýdent ustaldy
ASTANA. 27 naýryz. QazAqparat - Almaty qalasynyń krımınaldyq polıtsııa qyzmetkerleri Ýkraına eliniń azamatyna jasalǵan qaraqshylyq shabýyldy «izin sýytpaı» áshkereledi.
Bul týraly búgin brıfıngte QR Іshki ister mınıstrliginiń resmı ókili Nurdildá Oraz málimdedi.
Resmı ókildiń habarlaýynsha, 23 naýryz kúni tańǵy saǵat bes shamasynda Almaty qalasynyń Medeý aýdanyndaǵy kóshelerdiń birinde 4 beıtanys kisi 38 jastaǵy Ýkraına azamatyn soqqyǵa jyqty. Odan keıin onyń 1 myń eýro salynǵan qol sómkesi men uıaly telefonyn qoldy etip, oqıǵa ornynan boı tasalady.
«Jábirlenýshige keltirilgen zalal 336 myń teńgeni qurady. Jedel-izdestirý sharalarynyń barysynda 18-20 jas aralyǵyndaǵy qala kolledjderiniń birinde oqıtyn 4 stýdent qolǵa tústi. Tergeý jalǵasýda», - deıdi N. Oraz.
