Almatyda úkimettik emes uıymdardyń pikirtalas klýby qurylady

ALMATY. Maýsymnyń 14-i. QazAqparat /Erbol Azanbek/ - Almatyda úkimettik emes uıymdardyń korporatıvti mádenıet deńgeıin arttyrýǵa arnalǵan pikirtalas klýby qurylady. Bul týraly sheshim jaqynda Almatyda ótken «ÚEU men halyqaralyq uıymdardyń qazirgi kezeńdegi ózara árekettesý túrleri men ádisteri» atty dóńgelek ústel barysynda qabyldandy.

Dóńgelek ústeldi uıymdastyrǵan «Jalǵas» resýrstyq jáne konsaltıngtik ortalyǵynyń atqarýshy dırektory Mıhaıl Tıýnınniń aıtýynsha, otyrys barysynda bunymen qatar Memlekettik qurylymdardy, Parlament depýtattary men halyqaralyq uıymdardy shaqyra otyryp, Qazaqstandaǵy kommertsııalyq emes sektor jumysyndaǵy strategııalyq basym máselelerdi talqylaý maqsatynda birqatar jumys kezdesýlerin ótkizý de josparlanǵan. Bunymen qatar baıqaýlar men granttardyń biryńǵaı aqparattyq-keńes berý portalyn qurý da usynylǵan. «Qazirgi kezde memlekettik satyp alý týraly» arnaıy portal bar. Onda tenderler men memlekettik satyp alýlardyń qorytyndylary jarııalanady, ıaǵnı aıqyndylyq bar. Al ÚEU-dardyń qandaı tender utyp alyp, qalaı paıdalanyp jatqany týraly málimet joq, ıaǵnı aıqyndylyq joq. Jańa portal osy aıqyndylyqty qamtamasyz etýi tıis», deıdi Mıhaıl Tıýnın.

Dóńgelek ústel barysynda negizinen sheteldik donorlyk uıymdar jáne memlekettik qurylymdarmen jumys jasaý boıynsha máselelerdi talqylady. Bunymen qatar kommertsııalyq emes sektordyń ishki máseleleri de sóz boldy. Qoǵamdyq uıymdardyń ókilderi ÚEU-dar arasynda bytyrańqylyq, tómen korporatıvti mádenıet, kásibı deńgeıdiń tómendigi, ásirese «jas» ÚEU-dyń arasynda jemqorlyq, jobalardy júzege asyrý barysynda ashyqtyqtyń joqtyǵyn sóz etti.