Almatyda ÚEU-ǵa áleýmettik jobalardy iske asyrýdy jandandyrý usynyldy

ALMATY. QazAqparat- Almaty qalasy ákiminiń orynbasary Erjan Babaqumarov megapolıstiń azamattyq sektorymen yntymaqtastyq máselelerin talqylaý úshin úkimettik emes uıymdardyń ókilderimen kezdesti, dep habarlaıdy QazAqparat tilshisi.

Kezdesýge 80-nen astam ÚEU ókilderi keldi. Jıynnyń basty maqsaty -áleýmettik salany jaqsartý, sondaı-aq almatylyqtardyń, ásirese kómekke muqtaj adamdardyń ómir súrý sapasyn arttyrý jónindegi jobalardy pysyqtaý.

«Qala ákimi Baqytjan Saǵyntaev Almatyny «shetsiz qala» qaǵıdaty boıynsha damytý josparyn júzege asyrýda negizgi basymdyqty qoljetimdi áleýmettik ınfraqurylymdy qurýǵa baǵyttaýdy aıtqan edi. Bul – qalaǵa jańadan qosylǵan yqshamaýdandarǵa qatysty»,- dedi Erjan Babaqumarov.

Sonymen qatar, azamattyq belsendilerdiń qala turǵyndary arasynda salaýatty ómir saltyn nasıhattaýǵa, múmkindigi shekteýli adamdar úshin qoljetimdi qalalyq ortany uıymdastyrýǵa óz úlesin qosýǵa jaǵdaılary jetkilikti.

Osy baǵyttar boıynsha «Almaty Azamattyk Alyansy» ZTB tóraǵasy Konstantın Avershın, «Aqparattyq-resýrstyq ortalyq» qorynyń dırektory Altynaı Kóbeeva, «Aman-Saýlyq» qoǵamdyq qorynyń prezıdenti Baqyt Túmenova, «Ardı» QB tóraıymy Ásııa Ahtanova, «Almaty qalalyq múgedekter qoǵamy» QB basshysy Alı Amanbaev, «QR dıabettik aǵartýshylyq qory» QQ atqarýshy dırektory Natalıa Týkalevskaıa jáne t. b. óz usynystaryn bildirdi.

Sonymen qatar, azamattyq sektor ókilderine qıyn ómirlik jaǵdaıǵa tap bolǵan analardy qoldaý boıynsha qyzmetti kúsheıtý usynyldy.