Almatyda TJD atynan órt sóndirgishter satyp júrgen alaıaqtar paıda boldy
ALMATY. QazAqparat - Almatyda ózderin «qalalyq Tótenshe jaǵdaılar jónindegi departament qyzmetkerlerimiz» dep, órt sóndirgish satyp júrgender paıda boldy. Olar mámile jasaǵan jerde qolma-qol aqsha alyp, ornyna kiris orderin usynyp, órt sóndirgishterdi tótenshe jaǵdaılar jónindegi aýdandyq bólimnen alýǵa bolatyndyǵyn túsindirip, sol mekemeniń mekenjaıyn kórsetip otyrǵan.
«Taıaýda Almaty qalasynyń tótenshe jaǵdaılar jónindegi aýdandyq bólimderiniń birine N. esimdi kásipker keldi. Ol qazynalyq chekti kórsetip, órt sóndirgishter berýdi talap etti. Chekte tólengen somaǵa sáıkes, belgili bir mólsherde órt sóndirgishterdi berý týraly ótinim jazylǵan eken. Osyǵan baılanysty, Almaty qalalyq Tótenshe jaǵdaılar jónindegi departamenti turǵyndardan osyndaı jalǵan satýshylarǵa kezikken jaǵdaıda tez arada «102» telefony boıynsha quqyq qorǵaý organdaryna habarlasýlaryn suraıdy», - delingen málimdemede.
Sonymen qatar, Almaty qalalyq Tótenshe jaǵdaılar jónindegi departamenti órt sóndirý qyzmetteriniń órt sóndirgishterdi jáne basqa da órtke qarsy qurylǵylardy qaıta qýattaýmen nemese olardy satýmen aınalyspaıtyndyǵyn habarlaıdy.
