Almatyda tyıym salynǵan orynda sýǵa túsken 4 azamat ákimshilik jaýapqa tartyldy

ALMATY. QazAqparat – Almatynyń sý aıdyndarynda jazataıym oqıǵalardy boldyrmaý maqsatynda qalalyq Tótenshe jaǵdaılar departamenti aldyn alý is-sharalaryn júrgizýdi jalǵastyryp jatyr, dep habarlaıdy QazAqparat tilshisi.

Qazgıdromettiń málimetinshe, megapolıstegi aýa temperatýrasy – 35-38 gradýs. Bul Almaty qalasynyń turǵyndary men qonaqtaryn sýǵa túsýge ıtermeleıdi.

«Ótken aptadaǵy reıd barysynda 3 800-ge jýyq jadynama taratyldy. Sý aıdyndaryndaǵy qaýipsizdik erejelerin buzǵany úshin QR ÁQBtK-niń 412-baby boıynsha 4 adam ákimshilik jaýapqa tartylyp , 97 000 teńge aıyppul arqalady», - dep jazylǵan TJD habarlamasynda.

Jaýapqa tartylǵan azamattar tyıym salynǵan jerlerde, ıaǵnı, Shańyraq shaǵynaýdanyndaǵy Úlken Almaty ózeni (Alataý jáne Bostandyq aýdany), Qarasý ózeniniń saǵalarynda (Shestýha) (Túrksib aýdany) sýǵa túsken.