Almatyda tyrysqaqtyń taralýyna qarsy kúres júrgizilýde
ALMATY. QazAqparat - Almatyda sanıtarlyq dárigerler týrıster shetelden juqtyryp kelgen tyrysqaq aýrýynyń odan ári taralmaýyna kúsh salýda. Bul týraly búgin Óńirlik kommýnıkatsııalar qyzmetinde ótken brıfıngte aıtyldy.
Qoǵam densaýlyǵyn saqtaý qalalyq departamentiniń basshysy Aızat Moldaqasymovanyń aıtýynsha, epıdemııaǵa qarsy barlyq is-sharalar qolǵa alyndy.
Onyń aıtýynsha, bul aýrýdyń Qazaqstanǵa kelýine birneshe quzyrly organnyń jumysynyń salǵyrttyǵy sebep bolyp otyr.
Atap aıtqanda, dárigerler «Eır-Astana» avıakompanııasy qyzmetshileriniń jumystaryn qanaǵattandyrarlyq emes dep baǵalaýda.
Memlekettik shekarany asa qaýipti juqpaly aýrýlardyń ákelinýinen qorǵaý boıynsha QR DSM Qoǵamdyq densaýlyq saqtaý komıtetine de aıtylǵan.
«Tyrysqaq juqtyrǵan adamdar ushaqta ájethanaǵa jıi barady. Bul óte qaýipti aýrý. Birneshe saǵat ishinde adam 30 paıyz ylǵaldy joǵaltady. Ereje boıynsha ekıpaj mundaı adamdardy birden oqshaýlap, dereý bizge habar berýi kerek. Ushaq jerge qonǵan soń birden jolaýshyny tekserip, qalǵan jolaýshylardyń hal-ahýalyn bilýi tıis», - dedi Aızat Moldaqasymova.
Sonymen qatar, QR IDM bekitken «Azamattyq avıatsııada jolaýshylarǵa medıtsınalyq kómek kórsetý erejesiniń» talaptaryna qaramastan sońǵy aılarda «Nıý-Delı - Almaty» KS 908 reısi ushaǵyna asa qaýipti juqpaly aýrýdyń belgileri bar jolaýshylardy otyrǵyzýǵa ruqsat berilgen.
Departament ókilderi QR SІM Úndistannan keletin týrısterdiń ushar aldynda medıtsınalyq anyqtamasyz shyqpaýyn, aldyn alý is-sharalaryn qoldanýdy qarastyrýǵa ótinish bildirdi.
