Almatyda tyr jalańash samokat tepken jastar 10 kúnge qamaldy
ALMATY. QazAqparat – Almatyda ál- Farabı dańǵylynda tyr jalańash samokat tepken qyz ben jigit ustalyp, 10 kúnge qamaldy, dep habarlaıdy QazAqparat tilshisi.
Jergilikti polıtsııa qyzmetiniń málimetinshe, Almaty qalasynyń mamandandyrylǵan aýdanaralyq ákimshilik sotynda Almaty joldarynda kıimsiz samokatpen júrgen 1997 jyly týǵan M. esimdi qyz ben 2003 jylǵy G.esimdi azamatqa qatysty sot otyrysy ótti.
«Quqyq buzýshylardy Bostandyq aýdandyq polıtsııa basqarmasynyń qyzmetkerleri anyqtady jáne ustady. Olardyń ádepsiz áreketteri QR ÁQbK-niń 434-baby – usaq buzaqylyqpen kvalıfıkatsııalandy. Іstiń materıaldary sotqa jiberildi, onyń sheshimimen árqaısysy 10 táýlikke ákimshilik qamaýǵa alyndy», - dedi Almaty qalalyq PD jergilikti polıtsııa qyzmeti basqarmasynyń bastyǵy Erjan Uzabaev.
Aıta keteıik, Almatyda samokat mingen jalańash qyz ben jigittiń vıdeosy áleýmettik jelide taraǵan bolatyn.
