Almatyda «Tynys al, balaqaı» jobasynyń ekinshi kezeńi aıaqtaldy
ALMATY. 12 sáýir. QazAqparat /Áıgerim Ámir/ - Búgin Almaty qalasyndaǵy qalalyq perınataldyq ortalyqtar jáne №1, №2, №4, №5 perzenthanalarynyń balalar reanımatsııa bólimshelerine 38 845 248 teńge kóleminde kerekti jabdyqtar tapsyryldy.
Olar - tynys alý jabdyqtary, reanımatsııa ústelderi, perfýzorlar jáne ınfýzomattar. Joǵaryda atalǵan jabdyqtar, ár túrli aýytqýlarmen dúnıege kelgen nárestelerdi kútý úshin jáne de shala týǵan nárestelerge arnalǵan.
Bul shara «Aıala» qaıyrymdylyq qory aıasyndaǵy «Tynys al, balaqaı» jobasynyń ekinshi kezeńiniń aıaqtalýy bolyp tabylady.
«Tynys al, balaqaı» jobasy - Qazaqstan Respýblıkasyndaǵy perınataldyq ortalyqtar jáne perzenthanalardyń balalar reanımatsııa bólimshelerin ómirlik mańyzy bar jabdyqtarmen qamtamasyz etýge baǵyttalǵan.
«Tynys al, balaqaı» jobasy, Almaty qalasy boıynsha shala týǵan nárestelerdiń ómirge beıimdelip ketý sanyn 5%- dan 24%-ǵa deıin kóterýge áser etti, - deıdi «Aıala» qaıyrymdylyq qorynyń vıtse-prezıdenti Jangeldi Sársenov. Ol, sondaı-aq, atalmysh joba, qordyń eń qymbat jobalarynyń biri ekenin atap ótti.
Bul joba Kaspi bank-tyń kórsetken kómeginiń arqasynda júzege asty. Qazaqstan bıznesiniń qolbasshylary bolmaǵan jaǵdaıda, qorymyzdyń jobalary iske aspaıtyn edi. Kaspi bank, «Tynys al, balaqaı» jobasynyń birinshi kezeńine de qatysqan. Al, Almaty qalasynda ótken ekinshi kezeńi, túgelimen Kaspi bank tarapynan qarjylandyryldy. Qorymyzdyń, Qazaqstan Respýblıkasyndaǵy jańa týǵan nárestelerge joǵarǵy deńgeıde kómek kórsetýge baǵyttalǵan barlyq jobalaryna, Qazaqstannyń iri qarjy mekemeleri úlken túsinistikpen qaraıtyndary bizdi shyn júrekten qýantady» - dedi J.Sársenov.
