Almatyda tutynýshylardyń 30,7 paıyzy óz quqyqtaryn bilmeıdi

ALMATY. QazAqparat -Tutynýshylardyń arasynda júrgizilgen saýalnama barysynda olardyń 30,7 paıyzy óz quqyqtaryn bilmeıtindigi belgili boldy. Bul týraly qalalyq tutynýshylardyń quqyǵyn qorǵaý departamentiniń baspasóz hatshysy Nurbol Jumabekov málim etti.

«Quqyǵy buzylǵan jaǵdaıda suralǵan 626 adamnyń ishinde 259 adam (41%) saýda nysanynyń ákimshiligine júginetindigin bildirgen. Al 175 adam (27,9%) quqyq qorǵaý organdaryna shaǵymdanady. 192 tutynýshy, (30,7%) ózderiniń quqyqtaryn bilmeıtindikten, eshqaıda shaǵymdanbaıtyndaryn jetkizgen. Olarmen túsindirý jumystary júrgizildi», - deıdi ol.

Saýalnama nátıjesi kórsetkendeı, 707 tutynýshynyń ishinde 408 adam (57,7%) - bazarlarda, 266 (37,6%) adam - dúkenderde, 33 tutynýshy (4,7%) jaıma bazarda saýda jasaıdy.

«Kúmándi taýardy qaıdan aldyńyz?» degen saýalǵa jaýap bergen 351 adamnyń ishinde 180-i (51,3%) bazardan, 84 adam (23,9%) dúkennen, 87 adam (24,8%) jaıma bazardan alǵanyn aıtqan.