Almatyda tutynýshylar toptaryna saralanǵan tarıf engizilgennen keıin sý shyǵyny 104,5 mln. tekshe metrge qysqardy

Bul jaıly «Bastaý» memlekettik qazynalyq kásipornynyń bas dırektory Qýanyshkeldi Bazylov búgin Almaty 1 aqpannan bastap tutynýshylardyń tutyný kólemine baılanysty 3 deńgeıli saralaǵan tarıftiń engiziletine oraı ótkizilgen baspasóz máslıhatynda aıtty.

«Tutynýshylar toptaryna saralanǵan tarıfti engizgen soń apattyq jaǵdaılar 2008 jylǵy 3282-den 2012 jyly 2253-ke tómendedi. Sý shyǵyny 104,5 mln. tekshe metrge, al jyl saıynǵy sý jınaqtaý 65 mln. tekshe metrge qysqardy. Bul Kishi Almaty ózeniniń jyldyq aǵynymen teń keledi. Budan bólek, elektr qýatyn únemdeý 3 jylda 15 mln. kVt tómendedi. Aǵyndy sýdy tazartý sapasy 1,5 ese jaqsardy», - deıdi Q.Bazylov. Onyń aıtýynsha, 2008 jyldan beri sýmen qamtý boıynsha 47 shaqyrym sý jelileri aýystyryldy. 25 shaqyrym kabeldik jeli qaıta tóselindi. 2,8 myń japqyshtar alynyp, aýystyryldy. 68 qysym rettegish qondyrǵysy ornatyldy. Tereńdigi 500 metrge deıingi 17 uńǵyma burǵylandy. 181 dana sorǵy jabdyqtary almastyryldy. 3,9 myń jalpy úıge arnalǵan eseptegish quraly qondyryldy. Natrıı gıpohlorıdin qoldaný arqyly sýdy zalalsyzdandyrýdyń qaýipsiz tehnolgııasy engizildi. 16,8 shaqyrym kárizdik jeliler qaıta tóseldi. 750 myń tekshe metr tunbalar tazartýdan ótkizildi. Jalpy aýmaǵy 20 gektar bolatyn jańa tunba orny salyndy. Kárizdik tazartý ǵımarattaryn jetildirýdiń arqasynda aǵyndy sýdy tazartý sapasy aldyńǵy tazartýlarmen salystyrǵanda 1,5 esedeı jaqsardy.