Almatyda Tursynbek Kákishevtiń qurmetine eskertkish taqta ornatyldy
Saltanatty sharaǵa aqyn, jazýshylar, ǵalymdar, Almaty qalasy ákimdigi, óner, mádenıet, ǵylym salasynyń ókilderi, jazýshynyń týǵan-týysary qatysty.
«Búgin Almaty qalasynyń ómirinde ǵana emes, ultymyzdyń rýhanı keńistiginde úlken qýanyshty oqıǵa bolýda. Óıtkeni, búgin ultym dep ómir súrgen Tursynbek Kákishevtiń eskertkish taqtasy ózi turǵan úıine qoıyldy. Tursekeń ulttyq ádebıetimizdiń mártebesin kóterý úshin, tarıhyn tereńdetý úshin ómir súrgen adam. Biz onyń 21-shi ǵasyrdyń eleń-alań basynda jasaǵan eńbegin jete tanyp, zertteýimiz kerek. Onyń Sáken Seıfýllındi tanytýdaǵy eńbegi ereseń, 60-shy, 70-shi jyldary taıaq jep júrip, Maǵjannyń atyn taıǵa tańba basqandaı tanymal etti. Sáken men Maǵjan arasyndaǵy tamyrly baılanysty ǵajap zertteýshilik sheberlikpen jazyp edi, ol boıynsha bizge lektsııa oqyp edi. Osyndaı alyp tulǵanyń halyqqa sińirgen eńbegin Almaty jurtshylyǵy búgin úlken qýanyshpen qabyldap otyr»,- dedi aqyn, dramatýrg, memleket jáne qoǵam qaıratkeri Nurlan Orazalın.
Ol, sondaı-aq aldaǵy ýaqytta Tursynbek Kákishevtiń atyna Almatyda kóshe beriletinin aıtty.
«Bizdiń tulǵatanýda jiberip jatqan áttegenaılarymyz kóp. Qaısybirin aıtamyz. Tursekeń qoǵam kemshiligin betimizge basyp aıtatyn. Artyǵymyz bolsa qýanyp aıtatyn. Júregi keń edi. Tursekeńniń máńgilik joly endi bastaldy. Onyń atyna kóshe de beriledi. Tursekeń sekildi alashym dep ótken azamattardy biz áspetteýimiz kerek. Olardyń ómiri urpaqqa úlgi bolý kerek. Búgingi Tursekeń turǵan úıge qoıylǵan eskertkish taqta sonyń bir aıshyqty belgisi. Osy oraıda Almaty qalasy ákimdigine, el basynda júrgen azamattarǵa, bárine halyqtyń aıtar rızashylyǵy zor»,- dep quttyqtaýyn jetkizdi Nurlan Orazalın.
Aıta keteıik, fılologııa ǵylymdarynyń doktory, professor, Qazaq KSR eńbek sińirgen ǵylym qaıratkeri, Qazaqstannyń eńbek sińirgen qaıratkeri Tursynbek Kákishevtiń eskertkish taqtasy Almaly aýdany, Shagabýtdınov kóshesi, 171 úıge (Abaı dańǵylynyń qıylysy) ornatyldy.
