Almatyda turmysy tómen otbasylarǵa ystan qorǵaıtyn datchık tegin ornatylady

ALMATY. QazAqparat – Almaty qalalyq Tótenshe jaǵdaılar departamenti turmysy tómen otbasylardyń úıin ystan qorǵaıtyn datchıktermen tegin qamtıtyn boldy, dep habarlaıdy QazAqparat tilshisi.

«Ot jaǵý maýsymy jaqyndaǵanda TJD ókilderi jekemenshik sektordy aralap shyqty.

Mamandar 145 myń úıdiń peshterin tekserip shyqty. 2019 jyldyń basynan bastap 130 myń úı tekserildi. 300 myńǵa jýyq jadynama taratylyp, 170 kezdesý júrgizildi. Polıtsııa departamentimen birge áleýmettik az qamtylǵan otbasylardyń tizimi jasaldy», - dedi brıfıng barysynda qalalyq TJD basshysynyń orynbasary Arman Baıgelov.

Júrgizilgen jumystarǵa qaramastan Almatyda órtten 8 adam qaıtys boldy. Olardyń 4-ýi jekemenshik úıdiń turǵyny bolsa, 4-ýi kópqabatty páterde turǵan.

Barlyq jaǵdaıda da 2-15 sharshy metr aýmaqtaǵy úı zattary ǵana janǵan.

Ystan 35 adam ýlandy. Olardyń ishinde 18 bala bar.

«2018-2019 jyldyń jylytý maýsymynda jekemenshik sektorda 204 órt tirkelgen. Osyǵan baılanysty TJD mamandary jylytý maýsymyna muqııat daıyndalý qajettigin eskertedi. Atap aıtqanda, peshti jóndeýden ótkizip, qubyrlardy tazalap, elektr jelilerin de tekserýdi eskertemiz», - dedi ol.

Bıyl TJD mamandary kómir jaǵyp otyrǵan 16 myń úıdi aralap taǵy tekserip shyqpaq.

«Qazir áleýmettik jaǵynan az qamtylǵan otbasylardyń tizimin alyp jatyrmyz. Ázirge naqty sanyn aıta almaımyz. Osy otbasylarǵa ystan qorǵaıtyn datchık tegin ornatylatyn bolady», - dedi Arman Baıgelov.

Byltyr TJD 674 datchık satyp alǵan. Olardyń 514-i jekemenshik úılerde ornatyldy.