Almatyda turmystyq zorlyq-zombylyq azaıdy

ALMATY. QazAqparat- Turmystyq zorlyq-zombylyqtyń negizgi sebebi – ishimdikke salyný men jumyssyzdyq. Bul týraly óńirlik kommýnıkatsııalar qyzmetiniń alańynda Almaty qalasy polıtsııa departamentiniń jergilikti polıtsııa qyzmeti basqarmasy basshysynyń orynbasary Dıas Dýanbekov aıtty, dep habarlaıdy QazAqparat tilshisi.

«Turmystyq zorlyq-zombylyqtyń negizgi sebebi – ishimdikke salyný men jumyssyzdyq. Mas kúıde jasalatyn qylmystardyń aldyn alý maqsatynda 5 aıdyń qorytyndysy boıynsha 101 adam májbúrli túrde emdeýge jiberildi. Alkogoldi satý erejelerin buzǵany úshin 199 ákimshilik is sotqa joldandy»,- deıdi Dıas Dýanbekov.

Spıkerdiń sózinshe, turmys barysynda kezdesetin qylmystyń negizgi túri – adam óltirý jáne dene jaraqatyn salý. Mundaı aýyr qylmystar erli-zaıyptylar arasynda – 2 jaǵdaı, birge turatyndar arasynda – 2, jaqyn týystar arasynda – 2 oqıǵa tirkelgen.

Kóbinese qylmystar alkogoldik ishimdik tutyný saldarynan, qyzǵanysh pen urys-keristen keıin bolady.

«Almatynyń tártip saqshylary otbasylyq-turmystyq qarym-qatynas salasyndaǵy quqyqbuzýshylyqtardy turaqtandyrý men jaqsartýǵa baǵyttalǵan jumystardy júrgizedi. 2023 jyldyń 5 aıynyń qorytyndysy boıynsha turmystaǵy quqyq buzýshylyqtardyń úlesi barlyq tirkelgen quqyq buzýshylyqtardyń 0,05 paıyzyn qurady. Otbasylyq-turmystyq saladaǵy quqyq buzýshylyqtar 2,6 esege (14-ten 6-ǵa deıin) azaıǵan»,- dedi ol.