Almatyda túrkologııa máselesiniń jaı-kúıi talqylanady
ALMATY. 7 maýsym. QazAqparat /Erbol Azanbek/ - 17 maýsym kúni Almatydaǵy A.Baıtursynov atyndaǵy til bilimi ınstıtýtynda aıtýly qazaq ǵalymy, til zertteýshi Ǵubaıdolla Aıdarovtyń 90 jyldyǵyna arnalǵan «dóńgelek» ústel ótedi.
Jıynǵa belgili til mamandary, túrkologııa salasyn zertteýshiler qatysyp, kóne túrki tilderin zertteý men saqtaýdaǵy Ǵ.Aıdarovtyń orny, eńbegi jaıly oı bólispek. Sonymen qatar túrkologııa salasynyń problemalary, jetistikteri men bolashaǵy máselesi de sóz bolady.
Ǵ.Aıdarov (1921-2001) - QR ǵylymyna eńbek sińirgen qaıratker, fılologııa ǵylymynyń doktory, birneshe shet eldik ǵylymı ortalyqtardyń akademıgi. Túrkologııa salasyna qatysty 20-dan astap ǵylymı eńbekterdiń avtory, Qazaqstan, Bashqurtstan, Ázirbaıjan, Ózbekstan, Túrkmenstannyń til bilimi salasynda aıtýly ǵalymdardy tárbıelegen ustaz. Onyń «Bilge Qaǵan eskertkishindegi orhon tili», «Orhon eskertkishterindegi kóne túrki jazýlarynyń tili» jáne birqatar eńbekteri qazaqstandyq ǵylymda teńdessiz eńbekter bolyp sanalady.
