Almatyda Túrkııanyń Ulttyq Táýelsizdik jáne Balalar kúni atap ótildi
ALMATY. QazAqparat- Búgin Almatyda «Qazaqstan» qonaq úıinde 23 sáýir - Túrkııanyń Ulttyq táýelsizdigi jáne Balalar kúnine oraı, keń aýqymdy merekelik is-shara uıymdastyryldy.
«Túrkııa Respýblıkasynda jyl saıyn 23 sáýirde Balalar kúni atap ótiledi. Sonymen qatar, bul kún - Ulttyq táýelsizdik kúni bolyp tabylady. 1920 jyly 23 sáýirde tuńǵysh ret Túrkııa Parlamenti - Túrkııa Uly Ulttyq Májilisi (TUUM) qurylǵan bolatyn. Osy Májilistiń ashylýyna estelik retinde 1927 jyly Túrkııa Respýblıkasynyń kóshbasshysy Mustafa Kemal Atatúrik tarapynan 23 sáýir - Balalar kúni bolyp belgilendi. Búgin biz osy merekeni tek túrik balalarymen ǵana emes, sondaı-aq qazaq jáne ózge de ult ókilderiniń balalarymen atap ótkimiz keledi. Bizdiń esigimiz barlyq balalar úshin ashyq! Óıtkeni, balalar - bizdiń bolashaǵymyz! Bul kún álemniń barlyq balalary úshin dostyqtyń, yntymaqtastyqtyń bastamasy bolsa eken deımin», - dedi «QazAqparat» tilshisine bergen suhbatynda Túrkııa Respýblıkasynyń Almatydaǵy Bas Konsýly Ryza Qaǵan Iylmaz myrza.
Búginge merekelik is-sharaǵa Almaty qalasyndaǵy orta mektepterde bilim alyp alyp jatqan ár túrli ult ókilderiniń balalary, sondaı-aq, balalar úıleriniń tárbıelenýshileri - barlyǵy 200-den astam balǵyn qatysty.
Shara barysynda balalar túrik jáne qazaq ánderin shyrqap, bı bıledi jáne óleńder oqydy. Al anımator akterler zaldy aralap, óz ónerlerimen balalar men eresekterdiń kóńilin kóterdi.
Sonymen qatar, merekelik is-shara barysynda 12-16 jas aralyǵyndaǵy jasóspirimder arasynda lotereıa oınatyldy. Onyń qorytyndysy boıynsha baǵy janǵan bir ul jáne bir qyz balaǵa ata-analarymen birge Túrkııanyń Chanakkale qalasyna baryp kelýge týrıstik joldama tabys etildi.
Shara sońynda balalar merekelik torttyń dámin tatty jáne olarǵa demeýshiler tarapynan shaǵyn syılyqtar úlestirildi.
Aıta ketelik, Mustafa Kemal Atatúriktiń «Ult bolashaǵy - balalyq shaqta qalanady» degen sózi Túrkııada keńinen tanymal.
