Almatyda Túrkııa jáne Qazaqstan kásipkerleriniń 200-ge jýyq kezdesýi ótti
«Qazirgi tańda, jalpy kólemi 1,4 mıllıard AQSh dollaryn quraıtyn túrik kapıtalynyń Qazaqstan naryǵyna kelýimen 32 joba júzege asyrylyp jatyr. Olardyń basym bóligi qurylys, jeńil jáne kólik ónerkásibi salalaryn qamtyǵan. Búgingi memorandýmǵa qol qoıý aıasynda eki el arasynda osyǵan deıin baılanys bolmaǵan ózge de bıznes sektorlary jumyldyrylady», - deıdi MıÝSIAD-tyń Konıa qalasyndaǵy bólimshesiniń tóraǵasy Ómer Farýk Okka.
Túrik kásipkerleri delegatsııasynyń tóraǵasy Ómer Farýk Okkanyń aıtýynsha, Qazaqstan men Túrkııa arasyndaǵy bıznestiń nyǵaıýy eki eldiń saıası jáne ekonomıkalyq seriktestigin de nyǵaıtady.
«Shetelden ınvestıtsııa tartý - Qazaqstan úshin óte mańyzdy. Osyǵan oraı, úkimet tarapynan Qazaqstandaǵy shetel kásipkerlerine de sýbsıdııa qarastyrylǵan. Al búgingi ortaq kezdesýden keıin ınvestıtsııa kóleminiń artatynyna senemiz», - dedi «QazInvest» AQ Almaty qalasy boıynsha aımaqtyq dırektory Arsen Nasyrhanov.
QazInvest ókiliniń aıtýynsha, ótken jyly Túrkııanyń 12 iri ınvestory Qazaqstanǵa 660 mıllıon AQSh dollary kóleminde qarjy salyp, elimizdegi 15 ınvestıtsııalyq jobanyń júzege asyrylýyna septigin tıgizdi. Bul Elbasy Nursultan Nazarbaevtyń 2016 jyly Ystanbul qalasyna saparyndaǵy túrik kásipkerlerimen kezdesýiniń tabysty nátıjesi.
Búgingi shara aıasynda B2B formatynda eki el arasyndaǵy saýda qatynasyn nyǵaıtýǵa baǵyttalǵan 200-ge jýyq kásipkerlik kezdesý uıymdastyryldy.
Aıta ketsek, Túrkııadan keletin saýda delegatsııalarynyń sektorlyq qyzmetteri qurylys, mashına jasaý, metall, avtomobıl, qosalqy bólshekter, zergerlik buıymdar jasaý, elektronıka, esepteý tehnıkasy, jıhaz, turmystyq tehnıka jáne aýany baptaý salalaryn qamtymaq.
Joldas Órisbaev