Almatyda túrki jurtyna ortaq jyrlar oryndaldy
ALMATY. QazAqparat - Almatydaǵy «Alataý» dástúrli óner teatrynda «Uly Dala eli» atty halyqaralyq jyrshylar festıvali ótti, dep habarlaıdy QazAqparat tilshisi.
Byltyr qala ákimi Baýyrjan Baıbektiń qatysýymen ótken jyr keshi bıyl kórermen suranysyna baılanysty qaıtadan ótkizilip, jyrshylar men dástúrli ánshilerdiń basyn qosty. Byltyrǵy keshti syr súleıi, tanymal jyrshy Almas Almatov júrgizse, bıyl sóz tizginin jyrshy, ǵalym Berik Júsipov ustady. Festıvalǵa Alpamys jyry sekildi túrki jurtyna ortaq týyndylarymen qatar, óz elderiniń etnomýzykasyn tanystyrýǵa bashqurt, qaraqalpaq, ózbek, qyrǵyz ultynyń óner maıtalmandary arnaıy shaqyrtyldy.
Berik Júsipov bastaǵan Lázzat Janamanova, Serik Qultaev, Danııar Rahymbaev, Ǵıbrat Jumaǵulov, Sandýǵash Múbárakqyzy syndy jyrshy termeshilerimiz Úmbetáli Káribaevtiń «Jambylǵa», Sáttiǵul Janǵabylulynyń «Musylmannyń balasy», Omar Shoraıaqovtyń «Tolǵaýy» men haly qáni «Nasııatty», Jambyl Jabaevtyń «Meniń pirim - Súıinbaı», Ábdiǵappar Aldajarulynyń «Termesin», Naýryzbek Nurjaýbaıulynyń «Biz sonarshy» jáne Súıinbaı Aronulynyń «Jigitterge ósıet» shyǵarmalaryn oryndady.
«Uly dala eli» halyqaralyq jyrshylar festıvaline qatysty tanymal jyrshy, folklortanýshy-ǵalym, Qazaqstannyń eńbek sińirgen qaıratkeri, «Parasat» ordeniniń ıegeri Almas Almatov «QazAqparat» tilshisine bergen suhbatynda Ortalyq Azııa, Túrikmenstan, Qaraqalpaqstan, Qyrǵyzstan, Bashqurtstannan ónerpazdardyń kelýi túbi bir túrki halyqtarynyń mádenıetiniń de, ádebıetiniń de, qany men jan-diliniń de bir ekenin bildiredi degen pikir aıtyp, jyr keshine joǵary baǵasyn bergen bolatyn.
Al Ózbekstan, Bashqurt, Qyrǵyz elinen kelgen jyrshylar kórermen kóńilinen shyqty. Keshte barlyǵy 20 adam óner kórsetti.
