Almatyda týrızmge koronavırýs qalaı áser etti

ALMATY. QazAqparat - 2020 jyly týrızm ındýstrııasy - koronavırýs pandemııasynan eń kóp zardap shekken salalardyń biri boldy. Qazir qazaqstandyq týrıster qaıda jıi saıahattaıdy jáne ishki naryq qalaı ósti? Osy jáne ózge de suraqtarǵa jaýap alý maqsatynda QazAqparat tilshisi birqatar mekemege saýal joldaǵan bolatyn.

QR Ulttyq qaýipsizdik komıteti baspasóz qyzmetiniń málimetinshe, 2020 shet elge shyqqan týrıster sany 67% azaıyp, 269 myń adamdy qurady.

«2020 jyly týrızm ındýstrııasy koronavırýs pandemııasynan ekonomıkanyń eń kóp zardap shekken sektorlarynyń biri boldy. 2020 jyly Almatyǵa 163,8 myń sheteldik týrıst keldi. Bul 2019 jylmen salystyrǵanda 72,7% -ǵa az. Іshki týrıster sany 624,9 myń adamdy qurady. (-30,4%, 2019 j. - 898,5 myń adam) «, - dep atap ótti vedomstvadan.

Almaty qalasynyń týrızm basqarmasynyń aqparatyna súıensek, qazirgi qalyptasqan jaǵdaılarǵa baılanysty týrıster TMD, Túrkııa, Arab elderin tańdaıdy.

«Osyǵan qaramastan, ishki týrısterdiń sany 422 myń adamǵa jetti. Qazirgi jaǵdaıdy eskere otyryp, biz ishki týrızmge erekshe nazar aýdaramyz. Negizinen taýly aımaqtarda týrızm ınfraqurylymyn damytý boıynsha júıeli jumystar júrgizilýde. Máselen, byltyr ortalyqtar, glempıng qonaq úıler salyndy, taý soqpaǵy abattandyryldy. Týrısterdiń qaýipsizdigin qamtamasyz etý maqsatynda biz bıyl tikushaq alańy, lashyqtar salynady. Taýly aımaqtarda týrıstik navıgatsııanyń biryńǵaı júıesin qurýdy josparlap otyrmyz «, - dep habarlady basqarmadan.

Búgingi tańda salanyń kadrlyq áleýetin damytýǵa erekshe nazar aýdarylyp otyr.

Jyl saıyn ekskýrsovodtarǵa arnalǵan semınarlar, áýejaı, temirjol vokzaldary qyzmetkerleri úshin trenıngter uıymdastyrylady.

Sonymen qatar, Almaty qalasy ákiminiń tapsyrmasy boıynsha, alǵash ret mýzeı, teatr, kitaphana qyzmetkerlerine aǵylshyn tilinen onlaın kýrs ótkizý josparlanyp otyr.

Oǵan 667 adam qatysady.

Dúnıejúzilik týrızm uıymynyń málimetinshe, 2021 jyly týrıster sany aldyńǵy jylmen salystyrǵanda 22-55% -ǵa ósedi.

Degenmen bul sala aldaǵy tórt jyl ishinde pandemııanyń áserinen zardap shegýi múmkin.

«Halyqaralyq tendentsııalar men sarapshylardyń pikirin eskere otyryp, biz 2021 jyly Almaty qalasyna týrısterdiń (syrtqy jáne ishki) sanyn 25% kóbeıtýdi josparlap otyrmyz, bul 921 myń adam. Almaty qalasynyń týrızm basqarmasy 2024 jylǵa qaraı týrıster sanyn 1,2 mlnǵa jetkizýdi kózdep otyr. Epıdemıologııalyq ahýaldy jaqsaratyn bolsa, jyl saıynǵy ósim 6-7% bolady», - dep atap ótti basqarmadaǵylar.