Almatyda týrızmdi damytýǵa arnalǵan jarnama naýqany bastaldy
ALMATY. QazAqparat - «Visit Almaty» týrıstik aqparat ortalyǵy Almaty qalasy men Almaty oblysynyń týrızm áleýetin damytý úshin aýqymdy jarnamalyq naýqandy qolǵa aldy, dep habarlaıdy QazAqparat tilshisi.
Bul jarnamalyq naýqan negizinen Qazaqstannyń, onyń ishinde Almatynyń turǵyndaryna baǵyttalyp otyr. Sáýir aıynyń sońynan qala kóshelerindegi bılbordtary men medıabordtarynda turǵyndardy otbasylarymen mýzeılerge, botanıkalyq baqqa, Úlken Almaty kóline, Qaıyńdy jáne Kólsaı kólderine, «Altyn Emel» ulttyq parkine saparlap, Túrgenniń alma baqtaryn tamashalaý usynylady.
«Sharanyń alǵashqy qadamy alyp shahar turǵyndaryn qamtyp, olarǵa «Óz qalańdy jaqsy tany» degen uran tastalady. Ekinshi kezekte el turǵyndaryna Almaty maqtan etetin mádenı jáne oıyn-saýqtyq týrızm, belsendi demalys jáne gastrotýrızmdi jarnamalaımyz»,- deıdi, «Visit Almaty» dırektory Kamıla Luqpanova.
Aqparattyq ortalyq Almaty qalasyn eki kúnde aralap, barlyq jaýharlaryn kórip, belsendi túrde demalý ıdeıasyn alǵa tartyp otyr. Osylaı Almaty qalasynyń turǵyndary óz qalasymen jaqynyraq tanysýǵa múmkindik almaq. «Visit Almaty» týrıstik aqparat ortalyǵy qalalyq syrtqy baılanys jáne týrızm basqarmasy negizinde qurylǵan. Ortalyq qyzmetkerleri saıahattaýshylarǵa týrıstik baǵyttar men oryndar, qonaqúıler, meıramhanalar jáne basqa da nysandar jaıly úsh tilde tolyq aqparat berip, qoldaý kórsetip keledi.
Foto: Visitalmaty.kz
