Almatyda týrıstik servısti jáne ınfraqurylymdy damytý qajet - B. Baıbek

ALMATY. QazAqparat - Almatyda týrıstik servısti jáne ınfraqurylymdy damytý qajet. Bul týraly búgin Almatyda 6-shy shaqyrylymdaǵy qalalyq máslıhattyń 7-shi sessııasy barysynda Almaty qalasynyń ákimi Baýyrjan Baıbek málimdedi.

«Týrızm salasy - Almaty qalasynyń damý kózderiniń biri. Bul týraly keshe sheteldik mamandar da ashyq aıtty. Almatynyń biregeıligi sol, ol taý bókterinde ornalasqan. Biz muny qashanda eskerýimiz kerek», - dedi B. Baıbek.

Sonymen qatar, qala basshysy álemdegi kóptegen kýrorttyq qalalardyń jazǵy týrızmdi damytyp jatqandyǵyn jetkizdi.

«Eger kólik keptelisi bolmasa Almatynyń áýejaıynan        «Shymbulaq» shıpajaıyna 20 mınýtta jetýge bolady. Áýejaıdan 20 mınýtta jetýge bolatyn mundaı shıpajaı álemde joq.  Ekinshiden, bıikte ornalasqan, úshinshiden qardyń sapasy joǵary. Osy úsh kórsetkish boıynsha bizdiń shıpajaı álemde alǵashqy on kýrorttyń qataryna kiredi», - dedi ákim.       

Degenmen, B. Baıbek, týrıstik servıs jáne ınfraqurylym boıynsha kemshilikter bar ekenin jasyrmady. 

«Biz jetkilikti qarjy jumsap, týrıstik servısti jáne ınfraqurylymdy damytý jaǵynan kemshin túsip jatyrmyz. Sondyqtan da basymdyqtarymyzdy aıqyndap, qalany damytýymyz kerek», - dedi ákim.