Almatyda týrıstik nysandardyń ortaq bazasy qurylady
ALMATY. QazAqparat - Almaty qalalyq Týrızm jáne syrtqy baılanys basqarmasy "Visit Almaty" týrısterge arnalǵan aqparattyq ortalyǵymen birlese otyryp Almatydaǵy týrıstik nysandardyń tizimin jınaqtap, bir bazaǵa shoǵyrlandyrý jumystaryn bastady, dep habarlaıdy QazAqparat tilshisi.
Bul Qazaqstandaǵy aımaqtyq týrıstik salany damytýdy júıelendirý baǵytyndaǵy alǵashqy jumys. Sonyń nátıjesinde qalanyń kórikti jerleri, kýrorttar, qonaqjaılar men dúkender, tamaqtaný oryndary jáne týrıstik ınfraqurylymnyń basqa da túrleri týraly aqparat biriktirilgen biregeı málimetter bazasy qurylmaq.
Ortaq málimetter týrızm ındýstrııasynyń obektileri men sýbektileriniń aǵymdaǵy jaǵdaıy, ınfraqurylymnyń myqty jáne álsiz jaqtaryn anyqtaý maqsatynda jınaqtalmaq.
"Osylaısha týrıstik ındýstrııa oıynshylarynyń qajettilikterin, týrbıznestiń aǵymdaǵy básekelestik usynysyn túsiný múmkin bolmaq. Sonymen qatar ınvestıtsııalardy ári qaraı josparlaýǵa, týrızmdegi kásipkerliktiń ósýine múmkindikter qalyptastyrýǵa jáne qala qonaqtary men turǵyndarynyń qajettilikterin qanaǵattandyrý maqsatynda ortaq bazanyń mańyzy zor», - dedi basqarmadan.
Jınaqtaý jumysyna 3 top tartyldy. Olardyń bireýi call-ortalyq formatynda jumys istep, saýalnama júrgizedi.
Al qalǵan ekeýi nysandarǵa baryp, tekseredi. Qazirdiń ózinde 15 aımaq boıynsha 1020 nysan tekserildi. Ol Almaty qalasymen qatar, Kólsaı kóli, Altynemel, Úńgirtas kesheni, Tamǵaly tas shatqaly, Rahat, Talhız tarıhı oryndary tirkeldi.
Visit Almaty baǵalaýy boıynsha, jumys nátıjesinde tizimge 5000 týroperator men Almaty jáne Almaty aımaǵyndaǵy týrıstik baǵytta jumys jasaıtyn kásipkerler enýi múmkin. Jumystyń basym bóligi 2017 jyldyń sońyna qaraı aıaqtalady.
