Almatyda týrıstik qyzmet kórsetýde alaıaqtyqpen aınalysty degen kúdikpen 43 jastaǵy áıel ustaldy
ALMATY. QazAqparat - Almaty polıtsııasy týrıstik qyzmet kórsetý salasynda alaıaqtyqpen aınalysty degen kúdikpen 43 jastaǵy áıeldi ustady. Bul týraly búgin Almaty q. ІІD baspasóz qyzmeti habarlady.
Almaty qalasynyń Almaly aýdandyq ІІB janyndaǵy polıtsııa bóliminiń deregi boıynsha, Galına Sharapovaǵa týrıstik qyzmet kórsetý salasynda birneshe ret aaıaqtyq árekettermen aınalysqan degen kúdik taǵyldy. Tek osy aýdan boıynsha qazir onshaqty qylmystyq is tergelip jatyr.
«Jábirlenýshilerdiń aryzdaryna súıensek, bul áıel «týrıstik joryqtardy uıymdastyramyn» dep, olardan aqsha alǵan. Biraq óz mindettemesin oryndamaǵan. Kúte-kúte shydamy taýsylǵan azamattar aldymen aýdandyq ishki ister bólimine, keıin bizdiń polıtsııa bólimine júgindi. Sharapova ustalyp, QR Qylmystyq protsessýaldyq kodeksiniń 128-shi baby boıynsha ýaqytsha tergeý abaqtysyna qamaldy. Oǵan qatysty sotqa deıingi tergeý amaldary aıasynda bultartpaý sharasy qoldanyldy. Aldyn ala esep boıynsha, aldanǵan azamattarǵa keltirilgen shyǵynnyń somasy - 2 mln. teńgeden asady», - dedi osy keleńsiz jaǵdaıǵa baılanysty Almaly aýdany ІІB janyndaǵy polıtsııa bólimi bastyǵynyń orynbasary, polıtsııa maıory Dıar Razyev.
Sondaı-aq, tergeýshiler tergeý sharasy barysynda kúdiktiniń osy tektes basqa da qylmystarǵa qatysynyń bary-joǵy tekserilip jatqandyǵyn aıtty. Osyǵan baılanysty, polıtsııa qyzmetkerleri ustalǵan áıeldiń quqyq buzýshylyq áreketteriniń «qurbany» bolǵan azamattar bar bolsa, myna telefondarǵa habarlasýlaryn suraıdy.
Telefondar: 298-54-70 jáne 298-54-72.
