Almatyda týrıstik hab ashyldy
ALMATY. QazAqparat - Almatydaǵy Balýan sholaq atyndaǵy sport saraıynda týrıstik hab ashyldy, dep habarlaıdy QazAqparat tilshisi.
Shilde aıynda atalǵan sport nysanynyń shyǵys tusynan týrıster marshrýtqa shyǵatyn biryńǵaı núkte ashylǵan edi.
Osy núkteden Almatyǵa kelgen týrıster Almatynyń ishine ǵana emes, oblystyń terrıtorııasyna, Kólsaı kólderi, Sharyn shatqalyna saıahattap júr.
Endi osy ǵımaratta týrısterge arnalǵan zamanaýı stılde loft formatyndaǵy kovorkıng ortalyq ashyldy.
Ortalyq ulttyq naqyshta rásimdelgen.
Kireberiste Tamǵaly tastyń úlgileri jasalǵan. Arnaıy fotoaımaq, qolóner buıymdary, ulttyq sývenırler, almalar qoıylǵan.
Týrızm ortalyǵynyń basty artyqshylyǵy - biregeıliginde, bul jer jappaı týrızmnen mezi bolǵan, «bárin kórdim, bildim» dep oılaıtyn, jańa, erekshe dúnıelerdi jany qalaıtyn adamdar úshin qyzyq. Munda qyzyqty saparlar, saıahattar týraly bilýge, álemniń túkpir-túkpirin kórip qaıtqan adamdarmen tanysýǵa, bılet satyp alý nemese sapardyń baǵdary jaıly keńesýge bolady.
VisitAlmaty týrıstik aqparattyq ortalyǵy dırektory Edige Marǵulan ortalyqqa kelgen adam zamanaýı megapolıste júrip, birden birneshe ǵasyrǵa artqa tastap kóshpendiler zamanyn kóre alatynyn aıtty.
«Qalanyń sáýlet muralary Almatynyń qaıtalanbas ereksheligi dese bolady. Mysaly 1936 jyly boı kótergen akademık Júrgenov atyndaǵy akademııanyń ǵımaraty sol kezdiń ózinde álemniń úzdik 100 ǵımaraty qataryna kirgen. Mysaly bul týraly amerıkandyq oqýlyqtarda da jazylǵan. 1930-jyldardaǵy qurylys sapaly bolǵan. Sondyqtan, bul aqparattyń bárin almatylyqtar bilýi kerek. Osyǵan týrıstik ortalyq yqpal etpek», - dedi ol.
Hab úshin Balýaq Sholaq atyndaǵy sport saraıynyń tańdalýy tegin emes. 1967 jyly salynǵan ǵımarat sáýlet óneriniń eskertkishi bolyp tabylady. Ári qolaıly jerde onyń ornalasqan. Bul jerge qonaqtar qalanyń kez-kelgen núktesinen metro, avtobýs, trolleıbýs nemese velosıpedpen de jete alady.
