Almatyda týrıstik avtobýstarǵa arnalǵan turaqtar uıymdastyrylatyn boldy
ALMATY. QazAqparat – Megopolıstiń týrıstik ınfraqurylymyn damytý boıynsha jasalyp jatqan keshendi jumystardyń sheńberinde Almaty qalasynyń ákimdigi týrıstik avtobýstarǵa arnalǵan turaqtar uıymdastyratyn boldy, dep habarlaıdy QazAqparat tilshisi.
Almaty ákimdigi atap ótkendeı, mundaı ınfraqurylymnyń qajettiligi týraly máseleni qalamyzdyń týroperatorlary kópten beri kóterip kelgen. Turaqtar shahar turǵyndary men qonaqtary úshin eń tartymdy oryndarda salynady. Sonyń ishinde:
1. Respýblıka alańy (Sátpaev kóshesindegi turaq). Bul jerde eńseli elimizdiń erkindiginiń nyshany bolǵan «Táýelsizdik monýmenti» ornalasqan. Sondaı-aq, qalamyzdyń saıası ortalyqtary – Almaty qalasynyń ákimdigi, Prezıdent rezıdentsııalary osynda.
2. Yqylas atyndaǵy halyq mýzykalyq aspaptar mýzeıi (Zenkov kóshesindegi turaq). Bul jerde týrıster 28 gvardııashy-panfılovshylar atyndaǵy saıabaqta serýendep, Voznesensk kafedraldy shirkeýi, Dańq memorıalyn kóre alady.
3. Muhtar Áýezov atyndaǵy Qazaq memlekettik akademııalyq drama teatry (Abaı dańǵylyndaǵy aıaldama). Bul jerde týrıster «Jas Otaý» neke saraıy jáne Qazaq memlekettik tsırki ǵımarattarymen tanysa alady.
4. Qazaqstan Respýblıkasynyń Tuńǵysh Prezıdenti atyndaǵy saıabaǵy (Dýlatı kóshesindegi turaq). Dendrosaıabaqta alǵashqy aǵashtardyń birin (emen) Elbasy – Qazaqstannyń Tuńǵysh Prezıdenti Nursultan Ábishuly Nazarbaev 2001 jyly ózi otyrǵyzǵan.
Qalamyzdy týrıster úshin eń tartymdy ári qolaıly etý maqsatyndaǵy jumystar jalǵasatyn bolady.
