Almatyda týrıstik avtobýstar jańa orynnan jóneltiletin bolady
ALMATY.QazAqparat - Almatyda týrıstik avtobýstar Balýan Sholaq atyndaǵy sport jáne mádenıet saraıynyń qasynan jóneltiletin bolady, dep habarlaıdy QazAqparat tilshisi.
Qala ákimdigi baspasóziniń habarlaýynsha, bıyl 6 shildeden bastap Almatydan Kólsaı kólderi, Sharyn shatqaly jáne basqa da tanymal baǵyttarǵa baratyn týrıstik avtobýstar Balýan Sholaq atyndaǵy sport jáne mádenıet saraıynyń qasynan júretin bolady. Endi týrıster Abaı dańǵylynyń boıynan Baıtursynov kóshesiniń tusyndaǵy ońtústikke qaraı ornalasqan avtobýs turaǵynan saparǵa shyǵa alady.
Sonymen qatar, «Buryn ár jerden jolǵa shyqqan Alakól men Ystyqkólge baratyn avtobýstar jańa orynnan júretin bolady. Jóneltý baǵytynyń jańa ornyn anyqtaý Almaty qalasynyń negizgi týrıstik operatorlarymen kelisildi», - delingen habarlamada.
Bul ózgerister qala turǵyndary men qonaqtarynyń qalaǵan jerine qaýipsiz jáne jaıly jetýin qamtamasyz etý úshin qabyldanǵan.
