Almatyda týrıstik aqparattyq ortalyq ashyldy
ALMATY. QazAqparat - Almatyda týrıstik aqparattyq ortalyq ashyldy, dep habarlaıdy QazAqparat tilshisi.
Búgin Almatyda «Almatynyń vızıt ortalyǵy» atty týrıstik aqparattyq ortalyq resmı túrde ashyldy. Almaty ákimi Baýyrjan Baıbek ortalyqta qalaǵa kelgen árbir sheteldik qonaqtyń kórikti jerler, mádenı oqıǵalar, meımanhanalar týraly bir tereze prıntsıpi boıynsha tolyq málimetti qalaı alatyndyǵymen tanysty.
Qalanyń Týrızm jáne syrtqy baılanystar basqarmasynyń basshysy Erlan Jaılaýbaı vızıt ortalyqtyń Almaty turǵyndary men qonaqtaryna megapolıstiń týrıstik áleýeti týraly kásibı keńes, jol kartalary men taý baǵyttarynyń atlastaryn, týroperatorlar broshıýralaryn, mádenı- buqaralyq sharalardyń anonstaryn beretindigin aıtty.
Sonymen qatar ekskýrsııaǵa, sývenır buıymdarǵa tapsyrys alatyndyǵy, eń bastysy týrıster úshin mobıldi baılanys operatorynyń SIM-kartasyn beıimdeýdi júzege asyratyndyǵy atalyp ótti. Qazirgi kezde barynsha tanymal lokatsııalarda aqparattyq týrıstik kıoskiler ashý máselesi qarastyrylýda.
Basqarma basshysy óziniń sózinde mundaı ortalyqty ashý Parıj, London, Dýbaı, Nıý-Iork, Barselona syndy týrızm salasy damyǵan qalalar tájirıbesinen alynǵandyǵyn jetkizdi.
«Qazirdiń ózinde www.visitalmaty.kz resmı saıty jumys isteýde, keıin ol jeti tildi qamtıtyn bolady. Saıtta qalanyń tanymal kórnekti oryndary, ulttyq mázir daıyndaıtyn meıramhanalary, oqıǵalar tizbegi týraly tolyq aqparattar jarııalanady. Vızıt ortalyqta keńes berý, sývenır, sóılesý, túrli sharalar ótkizýdiń ınteraktıvti aımaqtary qamtamasyz etilgen. Tehnıkalyq turǵyda ortalyq ashylǵaly beri 109 týrıst habarlasty», - dedi ortalyq dırektory Ásel Nurkebaeva.
Ol saıahatshylar úshin tótenshe jaǵdaı týyndaǵan kezde túrli máseleni jedel sheshetin shuǵyl jeli qurylǵanyn da atap ótti.
Jalpy, «Almatynyń vızıt ortalyǵyn» bolashaqta memlekettik-jekeshelik áriptestiktiń katalızatoryna jáne Almaty klasteriniń týrıstik developmentine aınaldyrý josparlanǵan. Halyqaralyq naryqta týrıstik áleýetti kórsetý jobalaryn júzege asyrý, óńirdiń reıtıngi men básekege qabilettiligine taldaý jasaý, týrızmdi damytý múmkindikterin izdestirý, osy salada túrli zertteýder júrgizý TAO jumysynyń basty bóligi bolady.
