Almatyda týrısterge arnalǵan tramvaı qashan júredi

ALMATY. QazAqparat – Almaty ákimi Baqytjan Saǵyntaev Ortalyq kommýnıkatsııalar qyzmetinde ótken brıfıng barysynda qalanyń tómengi jaǵynda týrısterge arnalǵan tramvaı júrgiziletinin aıtty, dep habarlaıdy QazAqparat tilshisi.

«Týrıstik tramvaı júretin bolsa, ol sheteldik týrısterge qyzyq bolatyn marshrýttarmen júrýi tıis. Biz ol úshin 100 jyl buryn salynǵan aǵash úıler ornalasqan Úlken jáne kishi stanıtsa aýdanyn tańdadyq. Qazir ol úılerdi restavratsııadan ótkizip jatyrmyz. Ár úıdiń tarıhy bar.

Qashan ekeni áli belgisiz. Eger osy jobany júrgizip jibersek jaqsy bolar edi», - dedi ákim.

Aıta ketý kerek, bıyl aqpanda Almaty turǵyndarymen kezdesýinde Baqytjan Saǵyntaev Stambýldaǵydaı týrısterge arnalǵan tramvaı shyǵarýdy usyndy.

«Meniń oıymsha, burynǵy tramvaı júıesin qaıtarý múmkin emes. Bul bizdiń qalamyzdyń tarıhy bolyp qalady. Qazir elektr jelisimen júretin elektrobýstar, BRT, LRT sııaqty kóliktermen sheshilip jatyr», - dedi ol.

Týrıstik tramvaı Kókbazar mańaıymen júretin bolady.

«Ol jaqta arnaıy kóshe bar. Ol kóshede tramvaı júredi. Bul kólik eski qalany aralatyp kórsetedi. Kókbazardyń aınalasynda bizde de eski úıler kóp. Bizde osy oraıda ıdeıa týdy. Biz de eski qalany aralataý úshin qalaǵa kelgen týrısterge osy múmkindikti paıdalansaq. Al, barlyq qalada qaıtadan tramvaı jelisi salynbaıdy», - dedi ákim.