Almatyda týrıster jolbasshy karta kómegimen saıahattaıdy
ALMATY. QazAqparat - Visit Almaty týrıstik-aqparattyq ortalyq «Ońaı» transporttyq holdıngimen birlesip Almaty Pass kartasyn shyǵardy, dep habarlaıdy QazAqparat tilshisi.
Kartanyń kómegimen qalanyń kórikti jerlerin aralaýǵa bolady. Sondaı-aq qonaqúılerge, meıramhana men dámhanalarǵa, qoǵamdyq kólikte júrýge jeńildikter jasalady.
Almaty Pass Nıý-Iork, Barselona, London sııaqty álemniń týrıstik qalalary negizinde jasalǵan.
Karta jasaýshylardyń aıtýynsha, kórsetiletin qyzmetter paketi S, M, L shartty belgisine bólinedi. S paketi 7 810 ($23), M - 9 455 tenge ($28) ı L - 11 045 ($32) teńge turady. Týrlardy satyp alý kezinde jeńildikter qarastyrylǵan.
Barlyq «belgidegi» karta esebinen «Shymbulaq», «Lesnaıa skazka», «Kóktóbe», budan bólek 6 mýzeı, zoobaqqa barýǵa bolady.
«Almaty Pass jobasy qalanyń týrıstik áleýeti úshin mańyzy zor. Almaty - Qazaqstannyń basty týrıstik aımaǵy bolyp sanalady. Kez kelgen eki týrıstiń bireýi saparyn Almatydan bastaıdy. Osy jaǵdaılardy esepke ala otyryp, sheteldik týrısterdi tartý maqsatynda paıdaly júıelerdi oılap tabýymyz kerek. Sonyń biri Almaty Pass-ty engizý bolyp tabylady»,- dedi Visit Almaty týrıstik-aqparattyq ortalyq dırektory Kámıla Luqpanova.
Ortalyqtyń saraptama bóliminiń málimetinshe, Almatyǵa keletin týrısterdiń sany jyl saıyn 20% artyp keledi. 2015 jyly qala qonaqúıleri men hostelderi 721 myń týrısti qabyldaǵan. 2016 jyly - 793 myń, 2017 jyly - 969 myń týrısti jaılaǵan.
