Almatyda týrıster úshin 2019 jylǵy is-sharalar kúntizbesi jasaldy
ALMATY. QazAqparat - Almatyǵa byltyr 1,1 mln týrıst kelgen. Bul aldyńǵy jylǵy kórsetkishpen salystyrǵanda 11,8% kóp, dep habarlaıdy QazAqparat tilshisi.
Qalalyq ákimdiktiń qoǵammen baılanys qyzmetiniń habarlaýynsha, Almatyǵa keletin týrısterdiń sany jyl saıyn artyp keledi.
«Buǵan vızalyq rejimniń jeńildeýi, EKSPO jáne Ýnıversıadany ótkizý, týrıstik ınfraqurylymdy damytý, halyqaralyq is-sharalardy ótkizý serpin bolýda. Almatyǵa byltyr 1,1 mln týrıst kelgen. Bul aldyńǵy jylǵy kórsetkishpen salystyrǵanda 11,8% kóp. Al sheteldik týrıster sany 3,2% artty. 2018 jyly qalaǵa 365 myń sheteldik týrıst keldi. Bul, bizdiń elge kelgen týrısterdiń 44% Almatyǵa keletinin bildiredi», - dedi qoǵammen baılanys qyzmetiniń ókilderi.
«Halyqqa arnalǵan qala» jobasy boıynsha turǵyndar men týrıster úshin jaıly qalalyq ortany qurý maqsatynda 2 jyl ishinde tarıhı ortalyqtyń 60% keshendi jańartyldy.
Jaıaý júrginshiler joldary jáne jasyl aımaqtar keńeıtilip, servıstik jeke nysandardyń sapasy aıtarlyqtaı ózgerdi.
Byltyr Almatyda jumys isteıtin agenttikter úshin óńirlik BUU habynyń jańa ǵımaraty ashyldy.
Kommýnaldyq menshikke berilgen «Balýan Sholaq» sport kesheninde týrıstik operatorlar, jyljymaıtyn múlik agenttikteri, qolóner ortalyǵy, týrıster úshin demalys oryndary ornalasqan eldegi jalǵyz týrıstik hab uıymdastyryldy.
Sheteldik týrısterdiń kópshiligin kóshpeliler mádenıeti, Almaty qalasynyń 1 myń jyldyq tarıhy qyzyqtyratynyn aıta ketý kerek. Sondyqtan «Rýhanı jańǵyrý» baǵdarlamasy sheńberinde «Boraldaı saq qorǵany», «Saq Qorǵany» jáne «Raıymbek batyr» murajaılaryn, «Qazaqfılm» aýmaǵynda «Ethnoland» etnomádenı keshenin salý josparlanyp otyr.
Ahýaldyq týrızm sheńberinde jyl saıyn keminde halyqaralyq masshtabtaǵy 50 is-shara ótkiziledi. Olardyń arasynda Halyqaralyq djaz festıvali, Spirit of Tengri, Star of Asia, Orkestrler parady, Almaty Kóktóbe Opera, Apple Fest, Tour of Almaty, Almaty Maraphon, Almaty Mount Fest bar.
Oqıǵalyq týrızmdi ilgeriletý maqsatynda týrıstik oqıǵalyq kúntizbe ázirlendi. Ol 2019 jyldyń sońyna deıin ótkiziletin barlyq negizgi is-sharalardy qamtıdy. Kúntizbe barlyq aqparat núktelerinde, BAQ-ta, áleýmettik jelilerde, tanymal halyqaralyq platformalarda taratylady.
Sońǵy jyldary qalada týrıstik bıznesti júrgizý úshin qolaıly jaǵdaılar jasalǵanyn eskere otyryp, jeke ınvestorlar tarapynan týrıstik salaǵa qyzyǵýshylyq baıqalady. Osylaı, 2018 jyldyń qorytyndysy boıynsha týrızmge salynǵan ınvestıtsııalar 28,7% artyp, 77,2 mlrd teńgeni qurady.
