Almatyda týrıster úshin 10 aqparattyq termınal ornatylady
ALMATY. QazAqparat – Almatyda týrısterdi jedel járdem jáne polıtsııa qyzmetine shuǵyl qosatyn 10 aqparattyq termınal ornatylady. Bul týraly Almaty Óńirlik kommýnıkatsııalar qyzmeti alańynda ótken onlaın-brıfıng barysynda qalalyq Týrızm basqarmasy basshysynyń orynbasary Marat Aınabekov aıtty, dep habarlaıdy QazAqparat tilshisi.
«10 lokatsııada aqparattyq termınaldar ornalastyrylady. Olar qala qonaqtaryna Almatynyń kórikti jerleri týraly aqparatty ınteraktıvti túrde usynatyn bolady. Stendter arqyly týrıster túrli qıyn jaǵdaılarǵa tap bolǵan jaǵdaıda polıtsııa qyzmetkerlerin, sondaı-aq jedel járdem qyzmetkerlerin shaqyra alady», - dedi Marat Aınabekov.
Bul qurylǵylar «Týrıstik aqparat ortalyǵy» JShS kórsetken lokatsııada:
1. Beıimbet Maılın kóshesindegi Almaty áýejaıynda;
2. Jibek Joly dańǵylyndaǵy kók bazarda;
3. Kóktóbede;
4. 28 panfılovshylar parkinde;
5. QR Tuńǵysh Prezıdenti parkinde;
6. Abaı-Baıtursynov kósheleriniń qıylysynda;
7. «Medeý» kesheninde;
8. Panfılov-Gogol kósheleriniń qıylysynda;
9. Panfılov-Jibek joly kósheleriniń qıylysynda;
10. «Forum Almaty» saýda ortalyǵynda;
11. «Dostyk Plaza» saýda ortalyǵynda;
12. Almaty 2 temirjol vokzalynda;
13. «Essentai Mall» saýda ortalyǵynda;
14. «Shymbulaq» TShK;
15. Almaty ortalyq stadıonynda;
16. Astana alańynda;
17. Abaı atyndaǵy Ulttyq opera jáne balet teatrynda;
18. Memlekettik mýzeıde;
19. «Mega Park», «Mega Alma-Ata» saýda, oıyn-saýyq ortalyǵynda;
20. «TsÝM» saýda ortalyǵynda ornalasady.
Bul termınaldar arqyly ınteraktıvti kartamen túrli nysandardy izdep tabýǵa, týrıstik marshrýt syzýǵa, barlyq álem tilderinde aqparat alýǵa, qalada bolyp jatqan sharalar týraly bilýge bolady.
Sondaı-aq, jedel núkteler boıynsha ájethana, medıtsınalyq kómek núktelerin tabýǵa múmkindik bar.
«Sonymen qatar, taýǵa shyǵatyn týrısterge apta saıyn týrıstik hab bazasynda (Balýan Sholaq atyndaǵy Sport saraıy aýmaǵynda) tegin bilim suhbattary ótkiziledi», - dep túsindirdi Marat Aınabekov.
Buǵan deıin Almatyda aýa temperatýrasynyń qubylmalylyǵyna baılanysty Bogdanovıch shyńyna shyǵýdyń qaýiptiligi eskertilgen bolatyn.
