Almatyda turǵyndardyń densaýlyǵyn tekseretin medıtsınalyq mobıldi top jumysyn bastady
ALMATY-QazAqparat- Almatynyń Qoǵamdyq densaýlyq basqarmasy 1-30 tamyz aralyǵynda qalanyń sapaly medıtsınalyq qyzmetke zárý aýdandaryna mobıldi toptardy jiberedi, medıtsına mamandary bir aı boıy turǵyndardyń densaýlyǵyn tekseredi, dep habarlaıdy QazAqparat tilshisi.
Densaýlyq aılyǵyna basqarmanyń Almaty qalasyndaǵy vedomstvolyq baǵynyshty medıtsınalyq uıymdary qatysady. Aılyqtyń maqsaty – medıtsınalyq qyzmetke bir qadam jaqyn bolýdy qamtamasyz etý.
Basty mindet – birinshi kezekte balalardyń, azamattardyń densaýlyǵyn saqtaý men nyǵaıtý jáne profılaktıka. Turǵyndardy jan-jaqty tekserý úshin jyljymaly keshender qajetti qondyrǵylarmen tolyq jabdyqtalǵan.
Terapevter, pedıatorlar, kardıologtar jáne basqa da bilikti dárigerler qabyldaý júrgizedi. Densaýlyq aılyǵy barysynda qalalyqtar aǵzadaǵy holesterın, qandaǵy qanttyń deńgeıin bilý úshin saraptamadan, VICh-ke jáne teri aýrýlaryna qatysty ekspress-testileýden ótedi, dene salmaǵy boıynsha antropometrııalyq qorytyndy alady, kóz qysymyn ólshetip, FG arqyly tekseriledi jáne ftızıatordyń qabyldaýynda bolady.
Bulardan ózge, medıtsına qyzmetkerleri «Halyqty tirkeýdiń regıstri» boıynsha tolyq maǵlumat beredi, mobıldi qosymshamen qalaı jumys jasaýǵa bolatyndyǵyn túsindiredi. Qalalyqtarǵa skrıng jáne mindetti medıtsınalyq saqtandyrý boıynsha tolyq aqparat usynylady.
Densaýlyq aılyǵy kezinde: Flıýorografııa, rentgen apparattarymen jabdyqtalǵan bes mashına; KamA bazasy negizinde eki jyljymaly medıtsınalyq keshen (JMK); PAZ bazasy negizinde bir JMK; Dıagnostıkalyq qondyrǵy (EKG, Rentgen- zertteý, FGDS) qyzmet kórsetetin bolady. Turǵyndarǵa kardıolog, pýlmonolog, terapevt, stomatolog, akýsher-gınekolog keńes beredi.
