Almatyda turǵyndar 4 naýryzdan bastap ózderiniń tizimde bary-joǵyn bile alady - B. Dospanov
ALMATY. QazAqparat - Almatyda 4 naýryzdan bastap saılaýshylar tizimi azamattarǵa tanysýǵa beriledi. Bul týraly búgin Almatyda ótken baspasóz máslıhaty barysynda Almaty qalasynyń aýmaqtyq saılaý komıssııasynyń tóraǵasy Baqytjan Dospanov málim etti.
«Saılaý týraly» zań boıynsha daýys berýge 20 kún qalǵanda, ıaǵnı 2016 jylǵy 28 aqpanda saılaýshylar tizimderi tıisti saılaý komıssııalaryna berildi. Qazir olar tekserilip jatyr. Al 4 naýryzdan bastap tizimder saılaýshylarǵa tanysýǵa beriledi. Sonda kez kelgen adam óziniń saılaý ýchaskesine kelip, tizimde óziniń bary-joǵyn bile alady. Bul óte mańyzdy másele. Sondaı-aq, daýys beretin kúni basqa eldi-mekende bolatyn azamattar, 4 naýryzdan bastap ózderi tirkelgen ýchaskelik saılaý komıssııalaryna júginip, esepten shyǵarý talonyn alýlary tıis. Sóıtip, daýys beretin kúni sol talondy alyp, kelgen jerindegi saılaý ýchaskesine baryp daýys bere alady», - dedi B. Dospanov.
Sonymen qatar ol Almatyda kúni búginge deıin Almaty qalalyq máslıhatynyń depýtattyǵyna 114 úmitkerdiń tirkelgendigin jetkizdi.
«Úmitkerlerdi tirkeý 2016 jylǵy 28 aqpanda túngi saǵat 24:00-de aıaqtaldy. Barlyǵy - 114 adam tirkeldi. Olar ózderiniń saılaýaldy úgit-nasıhat jumystaryn bastap ta ketti. 114 kandıdattyń ishinde 81 adam ózderiniń saılaý qoryn qurdy. Endi olar memlekettiń kepildik berilgen qarajaty esebinen ǵana emes, ózderiniń saılaý qorlary esebinen de úgit-nasıhat jumystaryn júrgize alady», - dedi B. Dospanov.
Aıta ketelik, úgit-nasıhat jumystaryna memleket tarapynan beriletin qarjy kólemi - 245 myń teńgeni quraıdy. Al úmitkerlerdiń saılaý qorynyń qarjysy sol úmitkerlerdi usynǵan partııalar men uıymdardyń jáne demeýshilerdiń qarajatynan quralady.
