Almatyda turǵyn úılerdegi beınebaqylaý kameralarynyń qatqyl dıskilerin urlaǵan azamat ustaldy (FOTO)
ALMATY. QazAqparat - Almaty polıtsııasy turǵyn úılerdiń kireberisterindegi beınebaqylaý kameralarynyń qatqyl dıskisin urlaýmen aınalysqan azamatty qolǵa túsirdi.
Bul týraly búgin Almaty qalalyq ІІD baspasóz qyzmetinen habarlady.
Ońaı oljaǵa qunyqqan uryny Jetisý aýdandyq ІІB shuǵyl áreket etý tobynyń qyzmetkerleri ustady. Qaskúnemniń aıtýynsha, qatqyl dıskilerdiń materıaldyq qundylyǵy kameralardan joǵary eken.
«Qazirgi tańda «B» esimdi azamattyń beınebaqylaý júıesiniń quramdas bólikterin urlaý boıynsha 30 derekke qatysy bar ekendigi anyqtalyp otyr. Ol barlyq oqıǵa boıynsha moıyndady.
Sondaı-aq, onyń urlaǵan zattardy qaıda satyp júrgeni de anyqtaldy. Árbir qatqyl dıskini ol 4 myń teńgege baǵalaǵan.
Endi urlanǵan dıskilerdi satyp alǵan azamattar da qylmystyq jaýapkershilikke tartylatyn bolady. Olardyń áreketine quqyqtyq turǵyda baǵa beriledi. Qazir sotqa deıingi tergeý amaldary júrgizilip jatyr. Bir aıta ketetin jaıt, «B» esimdi azamat jasyrynbaı batyl túrde áreket jasaǵan. Kerisinshe, qalanyń basqa da aýdandarynda qylmystyq áreketin jalǵastyra bastaǵan. Endi onyń basqa da qylmystarǵa qatysy bary-joǵy anyqtalatyn bolady», - dedi Jetisý ІІB bastyǵynyń orynbasary, polıtsııa maıory Dáýlet Sembetov.
Aıta ketelik, osy aralyqta beınebaqylaý júıesin ornatýmen aınalysatyn kompanııalardan quramdas bólikterdiń joǵalýy jaıynda aryzdar kelip tústi. 
