Almatyda turǵyn úıde gaz jaryldy: Úsh adamnyń jaǵdaıy aýyr
ALMATY. QazAqparat – Almatyda úsh qabatty jekemenshik úıde gaz jarylyp, 3 adam aýyr jaraqat aldy, dep habarlaıdy QazAqparat tilshisi.
«QazTransGaz Aımaq» AQ baspasóz qyzmetiniń málimetine sáıkes, Pervomaıka aýylyndaǵy Postyshev, 64 «V» mekenjaıynda barak tıptes 3 qabatty jekemenshik úıde jarylys boldy. Onda jaldamaly bólmelerde 12 otbasy turyp jatqan.
Oqıǵa ornyna jetken apattyq-dıspetcherlik qyzmettiń habarlaýynsha, jarylys birinshi qabattaǵy №3 páterde bolǵan. Qatty dúmpý úıdegi esik-terezeni, ishki qabyrǵalardy qıratqan.
Mamandardyń tekserýinen soń úıdegi gaz qazandyǵy qıramaǵany anyqtaldy.
Al qalalyq Qoǵamdyq densaýlyq saqtaý basqarmasynyń aqparatynsha, jedel járdem brıgadasy №4 aýrýhanaǵa 3 patsıentti jetkizdi.
Úsheýi da qazir jansaqtaý bóliminde jatyr.
«36 jastaǵy er adamnyń denesin 100 paıyz kúıik (3-dárejeli) shalǵan. Ol jasandy tynys alý apparatyna qosylǵan. Naýqastyń jaǵdaıy óte aýyr. 19 jastaǵy qyzdyń denesiniń 85 paıyzyn kúıik (3-dárejeli) shalǵan. Jaǵdaıy óte aýyr. 23 jastaǵy jigittiń beti, aıaq-qoldary kúıgen (1-dárejeli). Denesiniń 22 paıyzy zaqymdanǵan. Bul patsıenttiń de jaǵdaıy óte aýyr», - dedi basqarmanyń baspasóz qyzmetinen.
