Almatyda turǵyn úı sektoryndaǵy órtter sany 20 paıyzǵa azaıdy
ALMATY. QazAqparat – Almatyda jylytý maýsymy bastalǵaly jeke sektorda órtke qarsy qaýipsizdikti baqylaý sharalary kúsheıtildi. Bul týraly Óńirlik kommýnıkatsııalar qyzmetiniń alańynda ótken brıfıngte qalalyq TJD Memlekettik órt baqylaý basqarmasynyń basshysy Danııar Júsipov aıtty, dep habarlaıdy QazAqparat tilshisi.
Spıkerdiń sózinshe, Almaty qutqarýshylary jeke sektordy tekserý barysynda órt qaýipsizdiginiń 90-ǵa jýyq buzýshylyǵyn anyqtady.
«Ondaǵan úıdiń jaǵdaıy nashar bolǵandyqtan, murjalardy tazalaý, peshtegi jaryqtardy jóndeý, elektr symdaryn aýystyrý, kómirqyshqyl gazyn anyqtaý qurylǵylaryn ornatý jáne basqa da sharalar jasaý qajet boldy. Halyqtyń áleýmettik osal toptaryna erekshe kóńil bólindi. Máselen, tizimder túzetilip, 792 turǵyn úı esepke alyndy. Osyǵan baılanysty, qyrkúıek aıynda «Kómek qoly» aktsııasy uıymdastyrylyp, onyń barysynda az qamtylǵan otbasylarǵa gaz datchıkteri ornatyldy, buryn ornatylǵan datchıkterdiń batareıalary aýystyryldy, basqa da órtke qarsy jáne profılaktıkalyq kómekter kórsetildi. Turǵyn úı sektoryndaǵy órt kólemi 20 paıyzǵa azaıdy», - dedi Danııar Júsipov.
Sonymen qatar, ol bıyl 151 934 jeke turǵyn úı esepke alynǵanyn atap ótti. Onyń ishinde 1205 úı qatty otynmen jylytylady. Búgingi kúni olar 100% tekserýden ótti.
Baspasóz máslıhatynda belgili bolǵanyndaı, ıisten qorǵaıtyn datchıkterdiń arqasynda qutqarýshylar eki adamnyń ómirin saqtap qaldy.
